Ulaanbaatar
Б.Оюунсанаа: Үрийн нөөц, мод үржүүлгийн газрын тоо 84 хувиар өссөн
МОНГОЛЫН МЭДЭЭ | БАЙГАЛЬ ОРЧИН
Улаанбаатар, 2024 оны тавдугаар сарын 2 /МОНЦАМЭ/. “Тэрбум мод” үндэсний хөдөлгөөний хэрэгжиж эхэлснээс хойш үрийн нөөц, мод үржүүлгийн газрын тоо 84 хувиар өсжээ. Үндэсний хөдөлгөөний хүрээнд улсын хэмжээнд нийт 39 зүйлийн 12.2 тонн үрийн нөөц бүрдүүлсэн байна.
“Тэрбум мод” үндэсний хөдөлгөөний
хэрэгжилтийн талаар Ойн газрын дарга Б.Оюунсанаа, мод
үржүүлгийн чиглэлээр үйл ажиллагаа эрхлэх иргэн, нөхөрлөл, аж ахуйн нэгж,
байгууллагын тоо 2023 оны байдлаар 452 байна. Энэ нь үндэсний хөдөлгөөн
хэрэгжиж эхэлснээс хойш 32 хувиар нэмэгдсэн гэсэн үг юм.
Эдгээр газрууд өнгөрсөн жил 63 сая ширхэг
тарьц, суулгацын нөөц бүрдүүлсэн нь 2021 онтой харьцуулахад 41 хувиар
өсжээ. Салбарын хэмжээнд 2023 онд нийт 273 мянган га талбайд ойн хөнөөлт
шавжтай тэмцэх ажил хийж, 960 сая модыг доройтолд өртөн, хатаж хуурайшихаас
хамгаалж чадсан байна гэлээ.
2024 онд улсын төсвийн хөрөнгөөр:
4 мянган га талбайг ойжуулах, нөхөн сэргээх,
гол нууруудын татмыг ойжуулах зорилгоор 3.1 сая мод тарина,
8 сая га талбайд ойн зохион байгуулалтын ажил
хийж, ойн төлөв байдлыг үнэлнэ,
Түймрийн 500 км халз болон шороон зурвас
шинээр байгуулж, өмнө байгуулсныг сэргээнэ,
330 мянган га талбайд ойн хөнөөлт шавжтай
тэмцэн, 1.2 тэрбум модыг доройтолд өртөхөөс сэргийлнэ,
3 мянган га талбайд ойн арчилгаа, цэвэрлэгээ
хийнэ,
130 га талбайд хамгаалалтын ойн зурвас
байгуулна,
Мод үржүүлгийн газруудад техник, тоног
төхөөрөмжийн дэмжлэг үзүүлнэ.
