ЭМС-ын сайдын үүрэг гүйцэтгэгч Ц.Оюунбаатарт албан бичиг хүргүүлэв

МОНГОЛЫН МЭДЭЭ | ХУУЛЬ
batsaikhan@montsame.mn
2016-01-27 16:13:17

Авлигатай тэмцэх газраас Эрүүл мэнд, спортын сайдын 2015 онд 470 дугаар тушаалаар баталсан “Төрийн өмчийн эрүүл мэндийн байгууллагаас үзүүлэх төлбөртэй тусламж, үйлчилгээний журам”-ыг хянан үзэж, хүчингүй болгохоор хүргүүлэв.

Авлигатай тэмцэх газраас 2015 онд Эрүүл мэндийн салбарт авлига, ашиг сонирхлын зөрчлөөс урьдчилан сэргийлэх чиглэлээр Нийслэлийн “Өргөө”, “Хүрээ”, “Амгалан” амаржих газар, Улсын Нэгдүгээр төв эмнэлэг, Гуравдугаар төв эмнэлэг, Гэмтэл согог судлалын болон Халдварт өвчин судлалын үндэсний төв зэрэг эрүүл мэндийн томоохон төв, байгууллагад ажилласан юм. Дээрх эрүүл мэндийн байгууллагууд нь хүчингүй болсон Эрүүл мэндийн сайдын 2006 оны 277 дугаар тушаалаар баталсан “Төлбөртэй үзүүлэх тусламж үйлчилгээний жагсаалт, журам батлах тухай” шийдвэрийг үйл ажиллагаандаа мөрдлөг болгон ажиллаж байгаа нь нийтлэг байсан бөгөөд Эрүүл мэндийн сайдын 2014 оны “Журам, жагсаалт батлах тухай” /төрийн өмчийн эрүүл мэндийн байгууллагаас үзүүлэх төлбөртэй тусламж/ 223 дугаар тушаалыг мөрдөж ажиллах талаар тухай бүр зөвлөмж өгчээ.

Эрүүл мэнд, спортын сайдаас 2015 онд “Төрийн өмчийн эрүүл мэндийн байгууллагаас үзүүлэх төлбөртэй тусламж, үйлчилгээний журам” батлах тухай 470 дугаар тушаалыг батлан, 2014 оны 223 дугаар тушаалыг хүчингүй болгосон шийдвэрийг хянан үзэхэд Засгийн газрын 2010 оны 119 дүгээр тогтоолоор баталсан “Захиргааны хэм хэмжээ тогтоосон шийдвэр гаргах журам”-ын зарим заалтыг зөрчжээ. Тухайлбал, захиргааны хэм хэмжээ тогтоосон шийдвэрийн улсын нэгдсэн бүртгэлийн санд бүртгүүлээгүй, хэл найруулга нь тодорхой бусаас иргэд болон салбарын эрүүл мэндийн байгууллага, эмч ажилтнуудыг төөрөгдөлд оруулахаар зохицуулалтыг хэт ерөнхий байдлаар тусгасан, журмын төслийг байгууллагын цахим хуудаст 30-аас доошгүй хоног байршуулж олон нийтээс санал авахаар заасныг хэрэгжүүлээгүй, төсөлд олон нийтийн санаа бодлыг тусгах зорилгоор иргэн, салбарын эрдэмтэн, судлаач, шинжээч зэрэг мэргэшсэн хүмүүсийг хамруулсан хэлэлцүүлэг хийгээгүй дутагдал байна.

Иймд 470 дугаар тушаал нь эрх зүйн хувьд хүчин төгөлдөр болоогүй, иргэдэд төрийн үйлчилгээг ил тод, ижил түвшинд үзүүлэх нөхцлийг бүрдүүлээгүй, эмч, эмнэлгийн ажилтнуудын баримтлан ажиллах зарчмыг тодорхой тусгаж чадаагүй зэрэг авлига, ашиг сонирхлын зөрчил үүсэх нөхцөл бололцоог бий болгож болзошгүй байх тул уг шийдвэрийг хүчингүй болгуулахаар Эрүүл мэнд, спортын сайдын үүрэг гүйцэтгэгч Ц.Оюунбаатарт албан бичиг хүргүүлэв.

Ж.Батсайхан

 

Related news