Ulaanbaatar
“Frontier Capital Group” Монголд мөрийтэй тоглоомын бизнес эрхлэх эрхээ алджээ
ДЭЛХИЙН МЭДЭЭ | ЭДИЙН ЗАСАГСИДНЕЙ. /Calvinayre/. Австралийн “Frontier Capital Group” Монголд казино байгуулах, сугалааны бизнесээ алдсан байна.
Монголын үндэсний хонжворт сугалааг удирдан явуулах хэлэлцээрийг хүчингүй болгосон гэж Австралийн Хөрөнгийн биржид данстай “Frontier” компани мягмар гарагт мэдэгджээ.
Хэлэлцээрт заасан хугацаанд хэд хэдэн нөхцөл хангалтгүй байгааг борлуулагч тал болох “Monvest Group” “Frontier” компанид мэдээлжээ. Монгол Улс зөвшөөрсөн тохиолдолд “Frontier” компани тус улсад казино байгуулах эрхийг уг хэлэлцээрээр авсан байжээ.
Монголын үндэсний хонжворт сугалааг удирдан явуулах тусгай зөвшөөрөлтэй “Monvest Group”-ийн охин компани болох “BizNVIN” ХХК болон “Modern Capital Vest” ХХК-ийг “Frontier” худалдан авахаар хэлэлцэж байжээ.
Тус компани Монголын үндэсний хонжворт сугалааг явуулах эрхийг авах санал дэвшүүлсэн тухайгаа 2015 оны дөрөвдүгээр сард мэдэгдсэн бөгөөд энэ нь 2016 оны гуравдугаар сард бэлэн болох байжээ. Үүгээр ч зогсохгүй тус компани, дэлхийн покерын аварга шалгаруулах тэмцээний /WSOP/ ялагч Жонни Чанийг уг ажлын удирдагчаар томилж, Монголд мөрийтэй тоглоомын бизнес эрхлэх боломжийг судлах үүрэг өгсөн байжээ.
Мөн казиногийн тухай хуулийн төслийг 2015 оны эхээр УИХ-д өргөн барьсан боловч өдийг хүртэл хэлэлцүүлгийн шатанд явж байгаа ажээ.
Одоогийн байдлаар, мөрийтэй тоглоомын чиглэлээр хөрөнгө оруулах асуудлаа манай захирлуудын зөвлөл эргэн авч үзэж байна гэж “Frontier” мэдэгджээ.
Д.Нямтулга
