Ulaanbaatar
Нөөцийн өвс, тэжээл бэлтгэхэд 40 сая төгрөг гаргана
ОРОН НУТГИЙН МЭДЭЭ | АРХАНГАЙНутгийн захиргааны ордны ЗДТГ-ын VIP танхимд Баасан гарагт аймгийн онцгой комисс бүрэн ирцтэйгээр хуралдаж, өвс тэжээлийн нөөцөд мал хамгаалах сангаас хорин сая, хөдөөгийн ядуурлыг бууруулах хөтөлбөрийг хэрэгжүүлэх газраас хорин сая төгрөгийг тус тус гаргахаар шийдвэрлэв.
Түүнчлэн 2014 онд сумдад зээлээр олгосон өвс тэжээлийн үнэ арван гурван сая төгрөгийн өр авлагыг авч барагдуулах, Засаг даргын нөөц сангаас усны осолд ажилласан шатахууны зардал 2,1 сая төгрөгийг шийдвэрлэж, өвөлжилтийн бэлтгэл ажлыг хангах тухай Монгол Улсын Засгийн газрын 292 дугаар тогтоол, аймгийн Засаг даргын 03 дугаар албан даалгаварыг хэрэгжүүлэн сумд болон аж ахуй нэгж албан байгууллагуудын өвөлжилтийн бэлтгэл ажлыг шалгах комисс томилон, гурван чиглэлд хуваарь гаргаж, аравдугаар сарын нэгнээс арван тавны дотор зохион байгуулж дүнг танилцуулахыг онцгой комиссын гишүүн ЗДТГ-ын дарга Б.Лхагвасүрэнд даалгав.
Тус хурлаар цаг үеийн нөхцөл байдал, өвөлжилтийн бэлтгэл ажлыг хангах тухай хэлэлцэж, 2015 оны 08 дугаар сарын байдлаар аймгийн хэмжээнд гарсан гамшиг осол, хариу арга хэмжээний тухай ОБГ-ын орлогч дарга, дэд хурандаа Д.Эрдэнэбаатар, хөдөө аж ахуйн өвөлжилтийн бэлтгэл хангах ажлын явцын талаар Хүнс хөдөө аж ахуйн газрын дарга Ч.Баасанжав, Зоонозын өвчний нөхцөл байдлын талаар ЭМГ-ын дарга Р.Гандиймаа, Цаг агаарын урьдчилсан төлөв байдлын тухай ус цаг уур орчны шинжилгээний албаны хэлтсийн дарга Ж.Их-Оюун, цаг үеийн байдлаар “Эрдэнэт-Булганы цахилгаан түгээх сүлжээ”-Төрийн өмчит хувьцаат компаний дарга Н.Энхсайхан, дулаан хангамжийн талаар Эх голомтын илч ХХК-ий захирал Ч.Өсөхбаяр нар мэдээлэл хийлээ.
Өвөлжилтийн бэлтгэлийн ажлын явц ерөнхийдөө наазгай байгааг анхааруулж, ирэх өвөл хаварт бэлтгэх ажлыг эрчимжүүлэхийг бүх сум, багийн Засаг дарга , аж ахуй нэгж албан байгууллагуудын удирдлага нарт аймгийн онцгой комиссын хурлаас үүрэг болголоо.
Архангай аймаг Л.Булган
コメント