Я.Содбаатарыг ЗТХ-ийн сайдаар томиллоо

МОНГОЛЫН МЭДЭЭ | УЛС ТӨР
ariunbold@montsame.gov.mn
2018-10-05 13:31:30

Улаанбаатар /МОНЦАМЭ/. УИХ-ын чуулганы өнөөдрийн нэгдсэн хуралдаанаар Янгугийн Содбаатарыг Засгийн газрын гишүүн-Зам, тээврийн хөгжлийн сайдын албан тушаалд томиллоо.

Чуулганы хуралдааны үеэр УИХ-ын гишүүн Б.Энх-Амгалан транзит тээврийн урсгалыг нэмэгдүүлэх, шинэ нисэх буудалд эрсдлийн аудит хийх чиглэлд анхаарч ажиллахыг шинэ сайдад санууллаа. Харин О.Баасанхүү гишүүн ЗТХ-ийн сайдад УИХ-ын гишүүн бус, мэргэжлийн хүнийг томилох хэрэгтэй гэсэн санал хэлээд, нислэгийн тасалбарын үнийг бууруулах, автозамын түгжрэлийг бууруулах чиглэлд ямар бодлого баримтлахыг тодрууллаа.

Ерөнхий сайд У.Хүрэлсүх, “УИХ-ын гишүүн давхар хариуцлага хүлээж Засгийн газарт ажиллаж болно. Ер нь бол УИХ-ын гишүүн Засгийн газарт ажиллахыг би дэмжиж байгаа” гэсэн тайлбар хийлээ. Харин нэр дэвшигч Я.Содбаатар, “Онгоцны тасалбарын үнийг бууруулах чиглэлээр ЗТХЯ-наас бодлого гарган хэрэгжүүлж байгаа. Үүнд агаарын тээвэрлэгчдийн зардлыг бууруулах нь нэн чухал. Өөрөөр хэлбэл, шатахууны үнтэй холбоотой гэсэн үг. УИХ-аас агаарын тээврийн салбарт либералчлал хийх шийдвэр гаргасан. Энэ шийдвэрийг хэрэгжүүлэхийн төлөө ажиллана. Нийслэлийн автозамын түгжрэлийг бууруулахад нийтийн тээврийн хөгжил чухал үүрэг гүйцэтгэнэ. Нийтийн тээврийн хэрэгслийн насжилт, замын хөдөлгөөний соёлыг төлөвшүүлэхээс эхлээд олон асуудал бий. Нөгөөтэйгүүр шинээр барьж буй гүүр, давхар гарцын ажуулыг цаг тухайд нь ашиглалтад хүлээн авахад анхаарах болно” гэлээ.

Мөн үеэр Д.Тэрбишдагва гишүүн Хөшгийн хөндийн нисэх онгоцны буудлыг хэзээ ашиглалтад оруулахыг тодруулав. Түүнчлэн өмнөх сайдуудын хэрэгжүүлж байсан бодлого, төсөл хөтөлбөрүүдийг үргэлжлүүлэх, төрийн бодлогын залгамж чанарыг хангахад анхаарч ажиллахыг захилаа.Шинэ нисэх онгоцны буудлыг ирэх оны тавдугаар сард ашиглалтад оруулахаар ажиллаж байгаа талаар ЗТХЯ-ны мэргэжилтнүүд мэдээлэл өгснийг нэр дэвшигч Я.Содбаатар хэллээ.

Мөн гишүүдийн зүгээс ирэх оны төсвийн орлогыг бүрдүүлэхэд экспортоос олох орлого ихээхэн үүрэг гүйцэтгэх тул шинэ автозамын бүтээн байгуулалт, түүхий эдийн тээвэрлэлт, хилийн боомтуудын үйл ажиллагааг эрчимжүүлэх шаардлагатайг хэлж байв. Түүнчлэн иргэний нисэхийн салбарыг хөгжүүлэх, тасалбарын үнийг бууруулах ажлыг цаг алдалгүй эхлүүлэх шаардлагатай гэв. Түүнчлэн ЗТХЯ-нд гарсан хүн амины хэргийн үнэн зөвөөр шийдвэрлэх, хариуцлага алдсан хүмүүст хариуцлага тооцох чиглэлд анхаарч ажиллахаг захилаа.

Ийнхүү санал хураалт явуулахад хуралдаанд оролцсон 65 гишүүнээс 90.8 хувь нь Я.Содбаатарыг ЗТХ-ийн сайдаар томилохыг дэмжлээ.

Я.Содбаатар нь 1992 онд Өвөрхангай аймгийн Хархорин сумын 10 жилийн I дунд сургууль, 1997 онд Улаанбаатар их сургууль Физикч-инженер мэргэжлээр, 2004 онд Удирдлагын академи тус тус төгссөн. Англи, Орос хэлтэй.

Ажилласан байдал:

1997-1999 онд ШУА-ийн харъяа Дулааны техник, үйлдвэрийн экологийн хүрээлэнд эрдэм шинжилгээний ажилтан

1999-2005 онд Монголын Ардчилсан Социалист Залуучуудын Холбоонд нарийн бичгийн дарга, ерөнхий нарийн бичгийн дарга

2005-2006 онд Үйлдвэр худалдааны сайдын зөвлөх

2006-2008 онд Үйлдвэр худалдааны дэд сайд

2009-2010 онд Мэргэжлийн хяналтын ерөнхий газрын дэд дарга, дарга

2010-2012 онд Монгол Ардын Намын Нарийн бичгийн дарга

2012-2016 онд Монгол Улсын Их Хурлын гишүүн

2016 оноос Монгол Улсын Их Хурлын гишүүн

Шагнал:

2006 онд Худалдаа, үйлдвэрийн тэргүүний ажилтан

2009 онд Алтангадас одон

2010 онд Улсын хяналтын тэргүүний ажилтан

Гэрэл зургийг Т.Чимгээ

Холбоотой мэдээ