Ерөнхийлөгч Х.Баттулга ирэх оны төсвийн талаарх санал дүгнэлтээ танилцуулна

Монголын мэдээ | Улс төр
ariunbold@montsame.mn
2018-10-12 08:39:19

Улаанбаатар /МОНЦАМЭ/. УИХ-ын чуулганы нэгдсэн хуралдаан өнөөдөр эхэлж, 10 хууль, тогтоолын төсөл хэлэлцэнэ.

Хуралдааны эхэнд ирэх оны төсвийн төслийг хэлэлцэх юм. Өнгөрсөн 7 хоногт уг асуудлыг хэлэлцэх үед АН-ын бүлэг ажлын 5 хоногийн завсарлага авсан нь өнөөдөр дуусгавар болж байна. Мөн хуралдаанд Ерөнхийлөгч Х.Баттулга оролцож, ирэх оны төсвийн талаар өөрийн санал дүгнэлтээ танилцуулахаар төлөвлөснийг өчигдрийн чуулганы хуралдаан өндөрлөх үед УИХ-ын дарга танилцуулсан.

Дараа нь амьтан, ургамал, тэдгээрийн гаралтай түүхий эд, бүтээгдэхүүнийг улсын хилээр нэвтрүүлэх үеийн хорио цээрийн хяналт, шалгалтын тухай, Дэлхийн худалдааны байгууллагын “Иргэний агаарын хөлгийн худалдааны хэлэлцээр”-т Монгол Улс нэгдэн орох тухай, Нийгмийн хамгааллын тухай Монгол Улс, Бүгд Найрамдах Польш Улс хооронд байгуулсан хэлэлцээрийг соёрхон батлах тухай хуулийн төслийг хэлэлцэх юм.

Түүнчлэн Согтуурах, мансуурах донтой хүнийг захиргааны журмаар албадан эмчлэх тухай, Онцгой албан татвараас чөлөөлөх тухай хуульд өөрчлөлт оруулах тухай, Валютын зохицуулалтын тухай, Хэмжил зүйн тухай хуулийн төслийг хэлэлцэнэ. Мөн үдээс хойш буюу 15.0 цагт гишүүдээс Ерөнхий сайдад хүргүүлсэн асуулгын хариуг сонсохоор төлөвлөсөн байна.

Холбоотой мэдээ