Ерөнхийлөгч Үндэсний аюулгүй байдлын зөвлөлийг хуралдуулна

Монголын мэдээ | Улс төр
ariunzaya@montsame.mn
2018-10-12 15:06:56

Улаанбаатар /МОНЦАМЭ/. Монгол Улсын Ерөнхийлөгч Х.Баттулга ирэх оны төсвийн төслийн талаар өөрийн санал дүгнэлтээ чуулганы нэгдсэн хуралдаанд танилцуулах үеэрээ оройн 18 цагаас төсвийн асуудлаар Үндэсний Аюулгүй Байдлын Зөвлөлийн хурал зарлаж буйгаа мэдэгдэв.

Тэрээр хэлсэн үгэндээ,"2019 оны төсвийн төсөлд УИХ-ын тойрогт хийх хөрөнгө оруулалтыг өсгөх замаар “авлигаддаг” зуршлаас Засгийн газар татгалзаагүй байна. Эдийн засаг сайжрах замдаа орсон хэмээн дүгнэж, түүхий эдийн мөчлөгөөс хамааралтай орлогыг өндрөөр төсөөлөх нь ямар балаг учирдаг болохыг саяхны туршлага нотолсон. Төсвийн 2019 оны тэнцвэржүүлсэн орлого 2 их наяд 445.1 тэрбум төгрөгөөр нэмэгдэнэ, үүний 1.3 их наяд төгрөгийг уул уурхайн салбараас олохоор тооцсон нь нийт нэмэгдэх орлогын 53.1 хувийг эзэлжээ. Өөрөөр хэлбэл хамгийн баталгаагүй орлогоор төсвийн талаас илүү хувийг бүрдүүлэхээр тооцож буй нь төсөвт асар том цоорхой гарч мэдэх эрсдэлтэй хэмээн шүүмжлэв. Мөн инфляци 2015 оны эцэст 1.9 хувьтай байсан бол өнөөдөр 8.8 хувь болж төгрөгийн ам.доллартай харьцах ханш 602 төгрөгөөр суларлаа. Энэ юуг хэлж байна вэ гэхээр Засгийн газар, Монголбанк инфляци, төгрөгийн ханшийг тогтвортой барих үүргээ биелүүлэхгүй байна гэж үзэж байна. Бараа үйлчилгээний үнэ өссөнөөс монгол хүн бүрийн орлого алдагдаж, нийгмийн ачааг голлон нугалдаг дунд давхаргыг үгүй хийж байна. Бензин шатахууны үнэ 19-30 хувиар өсчихөөд байхад салбарын сайд, Засгийн газар хариу үйлдэл үзүүлэх чадваргүй суусаар байна" хэмээн онцолсон.


Холбоотой мэдээ