Чөлөөтийнхөн Дэлхийн аваргын төлөө хүч үзэхэд бэлэн болжээ

МОНГОЛЫН МЭДЭЭ | СПОРТ
dusem11@yahoo.com
2018-10-17 11:40:13

Улаанбаатар /МОНЦАМЭ/. Унгарын нийслэл Будапешт хотноо энэ сарын 19-25-нд болох насанд хүрэгчдийн ДАШТ-д оролцох Монголын чөлөөт бөхийн эмэгтэй шигшээ багийн тамирчид маргааш эх орноосоо мордоно.


Харин эрэгтэй шигшээ багийн тамирчид мягмар гарагт Будапешт хотод очсон юм. Манай эрэгтэй бөхчүүд 1963 онд, эмэгтэй бөхчүүд 2001 онд Болгарын нийслэл Софид болсон ДАШТ-ээс эхлэн хүчээ сорьж байгаагаас Дэлхийн аваргын долоон алт, 20 мөнгө, 30 хүрэл, нийт 57 медалийг эх орондоо авчирсан түүхтэй.


Эрэгтэйчүүдийн 49, эмэгтэйчүүдийн 30 дахь удаагийн тэмцээнд Үндэсний шигшээ багийн ахлах дасгалжуулагч Б.Баттулга, гавьяат дасгалжуулагч А.Цэдэнсодном, Ц.Баярсайхан, ОУХМ Б.Батзориг, Ө.Ууганбаяр нарын удирдлага дор эрэгтэй, эмэгтэй бүтэн багаараа оролцоно.


Манай багаас гавьяат тамирчин О.Насанбурмаа хамгийн олон удаа буюу 10 дахь удаагаа ДАШТ-д хүчээ сорих бол гавьяат тамирчин Г.Мандахнаран долоо, Хөдөлмөрийн баатар С.Батцэцэг, гавьяат тамрчин П.Өнөрбат зургаа дахь удаагаа зодоглоно. Харин гавьяат тамирчин Э.Бэхбаяр, ОУХМ О.Үйтүмэн, Г.Наранчимэг, Э.Нарангэрэл тав, ОУХМ Б.Шоовдор дөрөв, Т.Түвшинтулга, Н.Золбоо, Э.Сумъяа, А.Батцэцэг гурав, ОУХМ Ө.Батзул, Э.Даваачимэг хоёр дахь удаагаа ДАШТ-д барилдах гэж байна. Тэгвэл ОУХМ Т.Тулга, Б.Бямбадорж, Л.Төртогтох, Э.Гантуяа, Х.Болортуяа гэсэн таван тамирчин дэлхийн шилдгүүдтэй анх удаа халз тулан хүч, ур чадвараа сорино. 

Холбоотой мэдээ