Монголбанкны ерөнхийлөгчийг огцруулах асуудлыг хөндөнө гэв

МОНГОЛЫН МЭДЭЭ | УЛС ТӨР
ariunbold@montsame.gov.mn
2018-10-17 15:35:56

Улаанбаатар /МОНЦАМЭ/. Монголбанкны ерөнхийлөгч Н.Баяртсайханыг огцруулах асуудлыг хөндөх болсон талаар өнөөдөр УИХ-ын гишүүн Т.Аюурсайхан мэдээлэл хийв.

Тэрбээр, “Төгрөгийн ханш суларч байгаагаас үүдэн иргэдийн худалдан авах чадвар муудаж байна. Монголбанкны зүгээс үүнийг дэлхийн зах зээлийн өөрчлөлтөөс үүдэлтэйгээр гарч буй асуудал мэтээр нийтэд буруу ойлголт өгч байгаа. Монголбанкны Ерөнхийлөгч Н.Баяртсайхан үүрэгт ажлаа хүлээж авах үед төгрөгийн ам.доллартай харьцих ханш 2043 төгрөг байсан. Үүнээс хойш 25.5 хувар суларлаа. Тиймээс Монголбанкны ерөнхийлөгч Н.Баяртсайханыг албан тушаалаас нь чөлөөлөх буюу хариуцлага тооцох асуудлыг хөндөн тавьж байгаагаа мэдэгдэж байна. УИХ "Төрөөс мөнгөний бодлогын талаар 2019 онд баримтлах бодлого батлах үндсэн чиглэл"-ийн төслийг хэлэлцэж байгаа. Үүнтэй холбогдуулан Монголбанкны удирдлагууд Тэрэлжид хүлээн авалт зохион байгуулж, Эдийн засгийн байнгын хорооны гишүүдийг урьсан байна. Өмнө нь Төв банкны тухай хуулийн төслийг хэлэлцэх явцад мөн ийм арга хэмжээ хийсэн. Энэхүү хуулийг баталсны дараа мөн талархлын хүлээн авалт хийж, авлигал өгч байсан. Тиймээс УИХ албан тушаалд томилсон хүндээ хариуцлага тооцох хэрэгтэй” хэмээв.

Холбоотой мэдээ