Дэлхийн дулаарлын улмаас шар айраг ховордож, үнэ нь өснө

ДЭЛХИЙН МЭДЭЭ | ШИНЖЛЭХ УХААН
ayanzaya@montsame.gov.mn
2018-10-17 14:39:46

МОСКВА. /РИА Новости/. Дэлхий даяар агаарын хэм өсч, хэт халалт байнга болсоор байгаа нь шар айраг эсгэдэг түүхий эд болох арвайн ургац зөөлөн уур амьсгалтай орнуудад эрс буурахад нөлөөлж, ингэснээр шар айраг ховордож, үнэ нь өсөх ажээ. Энэ тухай "Nature Plants" сэтгүүлд эрдэмтдийн бичсэн нийтлэлд дурдсан байна.


АНУ-ын Ирвин дэх Калифорнийн их сургуулийн судлаач Стивен Дэйвис болон түүний мэргэжил нэгт нөхөд судалгаа хийж, дэлхийн дулаарал /хэт халалт, ган гачиг, үер/ нь АНУ-ын хойд нутаг, Европ, Орос, Австрали болон Канадад голчлон тарьж буй арвайн ургацад хэрхэн нөлөөлөх вэ гэдгийг тооцоолжээ.


Эрдэмтдийн тооцоолсныг үзвэл, хэрвээ агаарын хэм хурдацтай өсөх аваас арвайн ургацын хэмжээ 17 хувиар буурах аж. Харин Парисын гэрээ хэрэгжсэн тохиолдолд арвайн ургац 4-5 хувиар буурна.


Өнөөдрийн байдлаар арвайн ургацын ихэнхийг мал тэжээхэд хэрэглэж байгаа ажээ.


Энэ мэт шалтгаанаар Ирланд, Бельги, Чехийн шар айрагны үйлдвэрүүдэд нийлүүлж буй арвайн хэмжээ 27-38 хувиар буурахаар байна. Үүний улмаас шар айрагны хомсдол бий болж, үнэ нь эрс нэмэгдэх аж. Тодруулбал, дэлхий даяар шар айрагны үнэ 2 дахин, харин Ирландад 6,5 дахин өсөх төлөв харагдаж байна. 


“Бидний хийсэн тооцоогоор, ган гачиг, хэт халалт болох он жилүүдэд дэлхийн шар айрагны үйлдвэрлэлийн хэмжээ 16 хувиар буурна. Энэ нь АНУ-ын одоогийн хэрэглээтэй харьцуулах хэмжээгээр багасна гэсэн үг. Олдоц ховордож, үнэ нь өссөнөөр дэлхий даяар хэдэн зуун сая хүн шар айраг уух боломжгүй болно” гэж Америкийн эрдэмтдийн нийтлэлд дурджээ.

 

Холбоотой мэдээ