Цагааннуурын боомтоор насжилт хэтэрсэн микро автобус нэвтрүүлэхгүй

ОРОН НУТГИЙН МЭДЭЭ | БАЯН-ӨЛГИЙ
bayanulgii@montsame.gov.mn
2018-10-20 11:48:52

Баян-Өлгий/МОНЦАМЭ/.Баян-Өлгий аймгийн нутаг дэвсгэрт орших Цагааннуурын боомтоор аравдугаар сарын 22-ноос эхлэн үйлдвэрлэгдээд 12 жил өнгөрсөн буюу насжилт хэтэрсэн, мэргэшсэн жолоочийн үнэмлэхгүй, техникийн хяналтын үзлэгт ороогүй, бага оврын микро автобуснуудыг нэвтрүүлэхгүй гэж аймгийн Мэргэжлийн хяналтын газраас  мэдээллээ.

"Өнгөрөгч есдүгээр сард тус аймгийн гурван микро автобус ОХУ-ын нутаг дэвсгэрт осолдсон. Хүний амь нас эрсдээгүй ч олон хүн гэмтэж бэртсэн асуудал гарсан. Үүнтэй холбогдуулан ерөнхий газраас ирүүлсэн үүрэг чиглэлийн дагуу Авто тээврийн үндэсний төвийн улсын байцаагчидтай хамтарч улс болон хот хооронд, сум хооронд, мөн хот дотор зорчигч тээврийн үйлчилгээ үзүүлдэг бага оврын автобуснуудад шалгалт хийсэн.

Шалгалтын дүнг холбогдох байгууллагуудад хүргүүлсэн бөгөөд ард иргэдийн аюулгүй байдлын төлөө ийнхүү арга хэмжээ авч байна" хэмээн  аймгийн Мэргэжлийн хяналтын газрын Авто тээвэр, өргөх механизмын хяналтын улсын байцаагч Б.Разухан хэлэв.

Түүний тайлбарласнаар тус аймагт Казахстан Улс руу зорчигч тээврийн үйлчилгээ үзүүлдэг 70 микро автобус байдаг бөгөөд үүнээс 10 гаруй тээврийн хэрэгсэл стандартын шаардлага хангадаг байна. Сум хооронд зорчиг тээвэрлэгдэг 30 автобуст шалгалт хийснээс зөвхөн дөрөв нь тэнцжээ. Мөн Өлгий хотын дотор 35-40 микро автобус нийтийн тээврийн үйлчилгээ үзүүлдгээс ихэнх нь үйлдвэрлэгдээ 12-оос дээш жил болсон аж.

Иймд мэргэжлийн байгууллагаас цаашид улс дотор ч стандартын шаардлага хангахгүй тээврийн хэрэгслээр нийтийн тээврийн үйлчилгээ үзүүлэх явдлыг таслан зогсоохыг зорьж байгаа бөгөөд иргэдийг найдвартай унаагаар үйлчлүүлж,  болзошгүй эрсдэлээс урьдчилан сэргийлэхийг  зөвлөж байна.  


Ө.Нурболат


Холбоотой мэдээ