Норвег улсын баялгийн сан хэрхэн ажилладаг, Монгол Улсад хэрэгжүүлэх боломжийн талаар ярилцав

МОНГОЛЫН МЭДЭЭ | УЛС ТӨР
ariunbold@montsame.gov.mn
2018-10-20 09:10:15

Улаанбаатар /МОНЦАМЭ/. Ази-Европын дээд хэмжээний 12 дугаар уулзалтад оролцож байгаа Монгол Улсын Ерөнхийлөгч Х.Баттулгын бусад орнуудын төр, засгийн тэргүүн нартай хийх уулзалтууд үргэлжилж, өчигдөр үдээс хойш Норвегийн Хаант улсын Ерөнхий сайд Эрна Солбергийг хүлээн авч уулзлаа.

Норвегийн Хаант улсын Ерөнхий сайд Эрна Солберг Монгол Улсын Ерөнхийлөгч Х.Баттулгад хүлээн авч уулзаж, хоёр улсын хамтын ажиллагааны чиглэлээр ярилцах боломж олгосонд талархал илэрхийлээд хүн ам цөөнтэй, дэлхийд жижиг гэгддэг хоёр улсад ижил, төстэй талууд цөөнгүй байгааг онцлон ярив.

Монгол Улсын Ерөнхийлөгч Х.Баттулга Норвегийн баялгийн сангийн талаар ихээхэн сонирхож, тус улсын баялгийн сангийн туршлага, үйл ажиллагааг судалж, Монгол Улсад хэрэгжүүлэх боломж байгаа эсэх талаар асууж, тодруулсан юм. Харин тодорхой зарим салбарт Норвеги улсын технологийг нэвтрүүлэх боломж байгаа бөгөөд тэр дундаа хөдөө, аж ахуйн гаралтай түүхий эдээр бүтээгдэхүүн үйлдвэрлэж, БНХАУ-ын зах зээлд нийлүүлэх боломж байгаа гэж үзэж буйгаа Монгол Улсын Ерөнхийлөгч Х.Баттулга хэллээ. Мөн энэ нь хоёр улсын залуу бизнесмэнүүдийг дэмжих томоохон боломж хэмээн үзэж байгаагаа дурдсан юм. Мөн тус улстай боловсролын салбарт хамтрах, тэднээс мэргэжлийн боловсрол эзэмшүүлэх туршлага судалж, өөрийн орондоо хэрэгжүүлэх сонирхолтой байгаагаа  илэрхийлэв.

Норвегийн Хаант улсын Ерөнхий сайд Эрна Солбергийн хувьд улс орны хөгжилд сайн инженерээс гадна сайн мэргэжлийн боловсрол олгохын чухлыг онцлон, их дээд сургуулиудаа нэгтгэх замаар эдүгээ улсынхаа хэмжээнд 9 их сургуультай болсон хэмээн сонирхууллаа. Мөн Норвегийн баялгийн сан хэрхэн ажилладаг талаар танилцуулж, энэ чиглэлийн туршлагаа хуваалцахад бэлэн байгаагаа илэрхийлсэн юм.

Талууд уулзалтын үеэр технологи, боловсрол, баялгийн сан байгуулах туршлага хуваалцах гэх мэт хэд хэдэн чиглэлээр хамтран ажиллах тухай ярилцаж, олон улсын түвшинд харилцан бие биеэ дэмжихээ илэрхийлэв.

Холбоотой мэдээ