Таеквондогийн баруун бүсийн тэмцээний шилдэг тамирчнаар Б.Ихбат шалгарчээ

ОРОН НУТГИЙН МЭДЭЭ | ЗАВХАН
myagmarsuren@montsame.mn
2018-10-26 11:23:09

Завхан/МОНЦАМЭ/.Завханы Цагдаагийн газрын дэргэдэх олон улсын таеквондогийн  "Цэцэн Шонхор" клубээс санаачилж олон улсын таеквондогийн Баруун бүсийн аварга шалгаруулах тэмцээн Улиастайд энэ сарын 19-21-нд боллоо.

Тэмцээнд Баян-Өлгий, Ховд, Говь-Алтай аймаг, Увс аймгийн "Ойрадын хүч" тулааны нэгдсэн холбоо, Завханы Цагаанхайрхан, Тосонцэнгэл сум, Сүхбаатар аймгийн "Эхлэл" клуб, Улаанбаатар хотын "Эрч Хүч", "Илд бамбай", "Төгс Эр зориг" зэрэг клубүүд, МҮИС, "Харч-Өөл" ХХК-ийн 200 гаруй тамирчин оролцжээ.

Тэмцээнд оролцогч тамирчид 117 багц медалийн төлөө дөрвөн төрлөөр өрсөлдсөн байна. Ийнхүү Баруун бүсийн тэмцээний шилдэг эрэгтэй тамирчинаар "Илд бамбай" клубын тамирчин Б.Ихбат, шилдэг эмэгтэй тамирчинаар мөн клубын тамирчин Ш.Яруу-Эгшиглэн нар шалгарч, өсөх ирээдүйтэй тамирчинаар МҮИС-ын тамирчин С.Галбадрах, "Эр Зориг" клубын тамирчин Ц.Чинбаяр, Увс аймгийн "Ойрадын хүч" тулааны нэгдсэн холбооны тамирчин Н.Адраа, Б.Маргад-Эрдэнэ нар тус тус шалгарчээ.

Харин багийн дүнгээр тэргүүн байрыг  "Хар бүс"  II данн-тай Р.Баттулга дасгалжуулагчтай "Илд Бамбай" клуб, удаах байруудыг Олон улсын хэмжээний мастер С.Зунгарав дасгалжуулагчтай Увс аймгийн "Ойрадын хүч" тулааны нэгдсэн холбоо, Олон улсын хэмжээний мастер, дэлхийн аваргын хошой мөнгөн медальт 2015 оны дэлхийн аварга Цагдаагийн дэслэгч С.Будхүү дасгалжуулагчтай Цагдаагийн газрын дэргэдэх "Цэцэн Шонхор" клуб тус тус эзэлжээ.

Энэ удаагийн тэмцээнд урилгаар Завхан аймгийн анхны Дэлхийн аварга Дөрвөлжин сумын харъяат Олон улсын хэмжээний мастер, Б.Бишгарав хүрэлцэн ирж шүүгчээр ажилласан байна.

Б.Мягмарсүрэн 

Холбоотой мэдээ