“Олон улсын хамтын ажиллагаа" дурсгалын мөнгөн зоос худалдаанд гарлаа

МОНГОЛЫН МЭДЭЭ | ЭДИЙН ЗАСАГ
dogsom@montsame.mn
2018-09-07 16:16:17
Улаанбаатар /МОНЦАМЭ/. Монгол Улстай дипломат харилцаатай ОХУ, БНХАУ, Япон, БНСУ-ын Олон улсын хамтын ажиллагааг илэрхийлсэн тэгш өнцөгт хэлбэртэй мөнгөн зоос худалдаанд гарлаа. Уг зоосны загвар нь Монгол Улс болон тухайн улсын бэлгэдлийг дүрслэн илэрхийлсэн ба 2019 онд эдгээр улс оронтой тогтоосон хамтын ажиллагааны тэмдэглэлт ойд зориулжээ.

Дурсгалын зоосыг Монголбанкны нэр, бэлгэдэлтэйгээр үнэт металлаар үйлдвэрлэх, зөвшөөрөл олгох, зоосыг бүртгэх, хадгалах, хамгаалах, тээвэрлэх, хяналт тавих, худалдан борлуулах, үйл ажиллагааг Монголбанкны Эрдэнэсийн сан  холбогдох хуулийн хүрээнд эрхэлдэг ба түүхэн дурсгалт үйл явдал, тэмдэглэлт ойг тохиолдуулан Монголбанк, төрийн болон төрийн бус байгууллагын хүсэлтээр дурсгалын зоосыг захиалан үйлдвэрлүүлдэг.
Монголбанк анх 1971 онд Ардын Хувьсгалын 50 жилийн ойд зориулан 1 төгрөгийн нэрлэсэн үнэтэй алт, мөнгө, никел, гуулин зоос гаргаснаас хойш дурсгалын цуврал зооснууд үйлдвэрлэх болсон юм. Тухайлбал,  Монгол Улсын түүхэн тэмдэглэлт ой, Их хаан Чингис, Өгөдэй, Гүюг, Хубилай зэрэг хаад,  мөн дэлхийн болон өөрийн орны төр нийгмийн зүтгэлтэн, олимпийн медальт тамирчид, ховор ан амьтад, 12 жил дэх амьтад гэх мэт Монгол Улсыг сурталчлах олон сонирхолтой сэдвийн дор цуврал  дурсгалын зоосыг худалдаанд гаргасаар байна. Дурсгалын зоосыг судлаач, цуглуулагч, сонирхогч иргэн, байгууллага Эрдэнэсийн сангаас худалдан авах боломжтой бөгөөд нэрлэсэн үнэ нь 20.000, худалдах үнэ нь 500 мянган төгрөгийн үнэтэй аж.
Холбоотой мэдээ