top banner
Шуурхай мэдээ

Залуусыг үнэгүй сургалтад хамруулж, хөдөлмөр эрхлэх боломжийг бүрдүүлнэ


2017-05-19 21:43:29
Зураг
Улаанбаатар /МОНЦАМЭ/ Залуучуудын хөгжлийг дэмжих олон талт үйл ажиллагаа явуулах “Нийслэлийн залуучуудын хөгжлийг дэмжих төв” өнөөдөр албан ёсоор нээлтээ хийлээ.

Нээлтийн ажиллагаанд Нийслэлийн Засаг даргын Ногоон хөгжил, агаарын бохирдол хариуцсан орлогч Ж. Батбаясгалан, Нийслэлийн Засаг даргын Тамгын газрын дарга М.Отгонбаяр, НЗДТГ-ын газрын Нийгмийн бодлогын хэлтсийн дарга М.Эрдэнэжаргал,   Нийслэлийн Залуучуудын хөгжлийн газрын дарга С.Сүх-Очир, БНСУ-аас Монгол Улсад суугаа Онц бөгөөд Бүрэн эрхт Элчин сайд У-Сун, “Эм Кэй Ай Ти” (MKIT) сургалтын төвийн Ерөнхий захирал Хван Ин,  (КОЙКА)-гийн Монгол дахь суурин төлөөлөгч Пак Сү Ён, “ХҮ ИС” ХК-ийн ерөнхийлөгч И Чон Жун, болон БНСУ-ын мэдээллийн технологийн салбарын тэргүүлэгч аж ахуйн нэгжүүдийн төлөөлөл оролцов.

“Залуучуудын хөгжлийг дэмжих төв”-ийн дэргэд залуучуудыг бизнесээ эхлүүлэх бүхий л боломжоор хангах зорилготой “Бизнес инкубатор төв, залуучуудын хобби клуб,  “Нийслэлийн залуучуудын сайн дурын төв”, тав тухтай орчин бүрдүүлсэн амралтын танхим, залуучуудын чадавхийг сайжруулах, эерэг хандлага төлөвшүүлэх сургалтаас эхлээд г олон талт үйл ажиллагаа явуулах юм.  

БНСУ-ын “ХҮ ИЗ” ХХК-ийн ерөнхийлөгч Ий Чон Жун: “Бид монголын залуучуудад мэдээллийн технологийн чиглэлээр сургалт зохион байгуулж, мэргэшүүлэхээс гадна Улаанбаатар хотод “Өгөгдөл мэдээллийн сангийн төв /Data backup center/”, “ХҮ ИЗ” дизайны төвийг байгуулж, нийслэлийн Залуучуудын хөгжлийн газар, БНСУ-ын хамтын ажиллагааны байгууллага (KOICA)-ын санхүүжилттэй төслийн гүйцэтгэгч “Эм Кэй Ай Ти” сургалтын төвтэй хамтран мэргэжлийн дизайнер бэлтгэх, бэлтгэсэн боловсон хүчнээр  “ХҮ ИЗ” ХХК-ийн төсөл, ажлыг гүйцэтгэх Мэдээллийн технологийн аутсорсинг /IT Outsourcing/-ийн тогтолцоог бий болгохоор ажиллана” гэлээ.

“Нийслэлийн Залуучуудын хөгжлийн газрын дарга С. Сүх-Очир: Цаашид бид БНСУ-ын Хамтын ажиллагааны байгууллага (KOICA)-ын санхүүжилттэй төслийн гүйцэтгэгч “Эм Кэй Ай Ти” ("MKIT") сургалтын төвтэй хамтран мэдээллийн технологийн чиглэлээр залуусыг үнэ төлбөргүй сургалтад хамруулж хөдөлмөр эрхлэх бололцоог бүрдүүлнэ. Тус төв нь нийслэлийн залуучуудыг богино хугацаанд мэдээллийн технологийн салбарт мэргэшүүлж, сурган, олон улсын зах зээлд өрсөлдөх чадвартай боловсон хүчин бэлтгэх, Монголын мэдээлэл технологийн мэргэжилтнүүдийн хөгжлийг дэлхийн түвшинд хүргэх зорилгоор  компьютерын өргөн хэрэглээний программын сургалтаас гадна “JAVA” хөгжүүлэгч, вэб хөгжүүлэгч, вэб дизайн, систем админстратор, өгөгдлийн сан зэрэг нарийн мэргэжлийн зургаан  төрлийн сургалтыг үнэ төлбөргүй явуулах юм.

Мөн тус төвөөр дамжуулан залуучуудыг сайн дурын ажилд уриалж, тусч соёлыг дэлгэрүүлж, нийгмийн сайн сайхны төлөө залуучуудын бодит оролцоог нэмэгдүүлэх зорилгоор “Нийслэлийн залуучуудын сайн дурын төв”-ийг нээн ажиллуулж байна.Манай төвд хандсанаар сайн дурын ажил хийсэн залуучууд маань мэдээллийн нэгдсэн санд бүртгүүлэх юм.  Дараа нь сайн дурын ажил хийсэн цагийг баталгаажуулан гэрчилгээ олгоно. Залуучууд сайн дурын ажил хийснээр тэтгэлэгт хөтөлбөрт хамрагдах, гадаад дотоодын их дээд сургуульд суралцах, төрийн байгууллага, хувийн хэвшлийн аж ахуйн нэгжүүдэд ажилд ороход ажлын туршлага, давуу тал болох юм. Одоогийн байдлаар бид залуучуудын чиглэлээр үйл ажиллагаа явуулах 50 гаруй төрийн бус байгууллагуудтай хамтран ажиллаж байна. Сайн дурын үйл ажиллагаа явуулж байгаа иргэд, аж ахуйн нэгж, төрийн бус байгууллагууд бидэнтэй холбогдон нийгмийн сайн сайхны төлөөх үйлст нэгдэхийг урьж байна” гэлээ.
 



 
 
 
 

Монгол брэнд