top banner

Лицензийн сонгон шалгаруулалт ирэх дөрөвдүгээр сард эхэлнэ


2018-03-20 15:12:11
Зураг
Улаанбаатар/МОНЦАМЭ/.Ашигт малтмалын лицензийн сонгон шалгаруулалт ирэх дөрөвдүгээр сарын эхээр болно хэмээн АМГТГ-ын  Кадастрын хэлтсийн дарга Д.Дашзэвэг мэдэгдлээ.

Ашигт малтмалын шинэ хуулийн хүрээнд сонгон шалгаруулалтаар лиценз олгохоор болсон. Сонгон шалгаруулалтын комиссыг Уул уурхай, хүнд үйлдвэрийн яамны дэргэд байгуулжээ. Засгийн газрын тогтоолоор батлагдсан 8 сая 600 мянган га талбайд аймгуудаас санал авсан бөгөөд эдгээрээс дэмжигдсэн газруудад сонгон шалгаруулалт явуулах юм байна. Одоогоор ямар хэмжээний талбайд лиценз олгох нь тодорхойгүй байгаа аж. Өнгөрсөн онд нийт 26 тусгай зөвшөөрлийг 11.5 га талбайд олгожээ.

Лицензийн төлбөр, үйлчилгээний хураамжаас 2017 онд улсын төсөвт 41 тэрбум төгрөг төвлөрсөн байна. Харин энэ жил нэмэлтээр зөвшөөрөл олгохгүйтэй холбоотой төсөвт төвлөрөх мөнгө багасах байх хэмээн албаныхан хэлж байна.

Дашрамд дурдахад улсын хэмжээнд нийт хайгуулын 1715 тусгай зөвшөөрөл,  ашиглалтын 1330 ширхэг тусгай зөвшөөрөл олгоод байгаа аж. Газар нутгийн хэмжээгээр лиценз олголт ашиглалтын 1 хувь, хайгуулын 5.7 хувийг эзэлдэг байна.
Б.Заяа

Монгол брэнд