top banner

Шороон болон цасан шуурга шуурах төлөвтэй байна


2018-03-31 12:13:17
Зураг
Улаанбаатар /МОНЦАМЭ/. Цаг агаарын урьдчилсан мэдээгээр өнөөдөр, маргаашдаа зарим нутгаар нойтон цас орж, салхи ширүүсэн, шороон болон цасан шуурга шуурах төлөвтэй байгааг Ус цаг, орчны шинжилгээний газраас мэдээлж байна.

31-нд баруун аймгуудын нутгийн баруун, зүүн аймгуудын нутгийн зүүн хэсгээр,  4 дүгээр сарын 01-нд баруун, төв, зүүн аймгуудын нутгаар, 2-нд зүүн болон говийн аймгуудын нутгаар, 3-нд баруун болон төвийн нутгаар хур тунадас, нойтон цас орно. Салхи 31-нд баруун аймгуудын нутгаар, 4 дүгээр сарын 01-нд ихэнх нутгаар, 2-нд зүүн зүгийн нутгаар 18-20 м/с, зарим үед 24 м/с хүртэл ширүүсч шороон болон цасан шуурга шуурна.

4 дүгээр сарын 01-нд нутгийн хойд хэсгээр, 2, 3-нд ихэнх нутгаар хүйтэрч Увс нуур болон Дархадын хотгор, Идэр, Тэс голын хөндийгөөр шөнөдөө 16-21 градус, өдөртөө 4-9 градус, Хангай, Хөвсгөл, Хэнтэйн уулархаг нутаг, Завхан голын эх, Хүрэн бэлчир, Ерөө, Тэрэлж, Хэрлэн, Онон, Улз, Халх голын хөндий, Орхон-Сэлэнгийн сав газраар шөнөдөө 9-14 градус хүйтэн, өдөртөө 2 градус хүйтнээс 3 градус дулаан, говийн бүс нутгийн өмнөд хэсгээр шөнөдөө 0-5 градус, өдөртөө 8-13 градус дулаан, бусад нутгаар шөнөдөө 5-10 градус хүйтэн, өдөртөө 0-5 градус дулаан байна хэмээн мэдээлж байна. 

Н.Туяа

 

Сурталчилгаа
Монгол брэнд