top banner

Жүдогийн УАШТ-д 300 гаруй тамирчин өрсөлдөж байна


2018-04-14 12:23:40
Зураг

Улаанбаатар /МОНЦАМЭ/. Жүдо бөхийн насанд хүрэгчдийн 2018 оны УАШТ-ий нээлтийн үеэр Монгол Улсын Ерөнхийлөгч Х.Баттулгын зарлигаар ОУХМ Л.Отгонбаатар, ОУХМ Д.Алтансүх, Монголын жүдо академийн дасгалжуулагч Г.Бат-Эрдэнэ тэргүүтэй МЖБХ-ны тамирчин, дасгалжуулагч, шүүгч нарт Төрийн дээд шагнал “Алтан гадас” одон хүртээлээ.

Баасан гарагт Спортын төв ордны “А” танхимд эхэлсэн УАШТ-д 300 гаруй тамирчид өрсөлдөж байна. Тэмцээний эхний өдөр эрэгтэй 81, 90, -100, +100 кг, эмэгтэй 70, -78, +78 кг-ын жингийн барилдаан болж, аваргууд тодорсон.

Өнөөдөр эрэгтэй 60, 66, 73 кг, эмэгтэй 48, 52, 57, 63 кг-ын жингийн барилдаан болж, медальтнууд тодорно. Энэ жилийн улсын аварга тэмцээний ерөнхий шүүгчээр Европын жүдо бөхийн холбооны спорт хариуцсан захирал, олимпийн зэрэглэлийн шүүгч, Австри улсын иргэн Арнолд Гмэйнер ажиллаж байна.

Өчигдөр цөөнгүй сонирхолтой барилдаан гарсан бөгөөд олон улсын тэмцээнд өндөр амжилт үзүүлсэн бөхчүүдээс эхний тойргоос хасагдсан бол шилдэг жүдочид ч аварга цолоо хамгааллаа.

Тухайлбал, эмэгтэйчүүдийн 70 кг-д “Гуанжоу-2010”, “Инчеон-2014” Азийн наадмын хүрэл медальт, Азийн АШТ-ий нэг мөнгө, хошой хүрэл медальт, ХУД, “Женко” клубын тамирчин ОУХМ Ц. Наранжаргал найм дахь түрүүгээ хүртсэн бол +78 кг-д “Хилчин” спорт хорооны тамирчин ОУХМ Б.Мөнхтуяа дөрөв дэх удаагаа улсын аварга болов.

Мөн эрэгтэйчүүдийн 90 кг-д цэргийн дэлхийн аварга, “Алдар” спорт хорооны тамирчин ОУХМ Г.Алтанбагана, -100 кг-д “Инчеон-2014” наадмын хүрэл медальт, Абу-Дабигийн “Их дуулга”-ын аварга, “Сүлд” спорт хорооны тамирчин ОУХМ Л.Отгонбаатар, +100 кг-д залуучуудын болон цэргийн дэлхийн аварга, “Алдар” спорт хорооны тамирчин ОУХМ Ө.Дүүрэнбаяр, эмэгтэйчүүдийн -78 кг-д Увс аймгийн тамирчин, спортын мастер Ц.Батцэцэг улсын хошой аварга болсон юм.

Эхний өдрийн алт, мөнгө, хүрэл медалийн эздийг танилцуулахад,

Эрэгтэйчүүдийн: 90 кг-д (16 жүдоч): алт Г.Алтанбагана (Алдар), мөнгө Б.Бат-Эрдэнэ (Хилчин), хүрэл Б.Тэнгис (Женко), Р.Анхбаатар (ТЕГ-ын “Эрч” клуб)

-100 кг-д (17): Л.Отгонбаатар (Сүлд), Б.Жанчивдорж (Хүч), Д.Цэрэнням (ТЕГ-ын “Эрч” клуб), Л.Энхтүвшин (Сүлд)

+100 кг-д  (25): Ө.Дүүрэнбаяр (Алдар), А.Давааням, Г.Пүрэвбаатар (хоёул Сүлд), Д.Пүрэвдорж (Женко)

Эмэгтэй: 70 кг-д (12): Ц.Наранжаргал (Хан-Уул дүүрэг, “Женко”), Б.Хонгорзул (Хилчин), С.Адилцэцэг (Алдар), А.Бадамгарав (Баянхонгор),

-78 кг-д (10):Ц.Батцэцэг (Увс, “Шинэ бадрах” дэвжээ), А.Батзул (Хан-Уул дүүрэг, “Женко”), Ц.Буянжаргал (Хан-Уул дүүрэг, “Женко”), Л.Уранчимэг (Хилчин)

+78 кг-д (9): Б.Мөнхтуяа (Хилчин), Ш.Сэржмядаг (Алдар), 3.Э.Гандиймаа (Хилчин), А.Адъяасүрэн (ТСБТСДуС) нар УАШТ-ий алт, мөнгө, хүрэл медальтан боллоо.
Өнөөдөр олон шилдэг бөхчүүд дэвжээнд гарах бөгөөд жин тус бүрт олон бөх барилдаж байна. Тодруулбал, эрэгтэй 60 кг-д 52 бөх барилдах бол 66 кг-д 32 бөх бүртгүүлжээ. Мөн 73, 81 кг-д тус бүр 28 бөх барилдана. Спортын төв ордны “А” зааланд болж буй жүдо бөхийн улсын аварга шалгаруулах тэмцээнийг С1, ETV телевиз шууд дамжуулан хүргэж байгаа юм.

 

Д.Өлзий


Монгол брэнд