top banner

“Мод тарих үндэсний өдөр”-ийг орон даяар зохион байгуулна


2018-05-12 10:59:09
Зураг
Улаанбаатар /МОНЦАМЭ/. Өнөөдөр Монгол Улс даяар “Мод тарих үндэсний өдөр”-ийн хүрээнд нийслэл болон аймаг, орон нутагт мод тарьж цэцэрлэгжүүлэх ажлыг аж ахуйн нэгж, байгууллага, компани, иргэд, хамт олны дунд зохион байгуулна.  

Мод тарих үндэсний өдөр зарлах тухай Монгол Улсын Ерөнхийлөгчийн зарлиг 2010 оны дөрөвдүгээр сарын 14-ний өдөр гарсан байдаг. Зарлигт дурдсанаар, Жил бүрийн 5, 10 дугаар сарын хоёр дахь долоо хоногийн Бямба гарагийг бүх нийтээр мод тарих үндэсний өдөр болгож зарласан юм. Энэхүү зарлиг гарснаас хойших 2010-2017 оны хооронд 16 удаагийн бүх нийтээр мод тарих өдрийг зохион байгуулж, нийт 1 сая 270 мянга гаруй иргэн 68.9 мянган аж ахуйн нэгж, байгууллагууд оролцож 10.5 сая мод тарьсан байна. Тарьсан моддоос 7.8 сая нь ургаж, амьдралын хувь нь 75 хувьд хүрчээ.

Зарлигийн дагуу бүх нийтээр мод, бут, сөөг, цэцэг тарих, цаашид арчлан хамгаалах, түүнийгээ амьдралын хэв маяг болгон хэвшүүлэн сурталчилж ажиллахыг Монгол Улсын нийт ард иргэд, айл өрх, төрийн болон төрийн бус байгууллага, аж ахуйн нэгж, хандивлагч нарт уриалж байна.

Өнөөдөх Монгол Улсын Ерөнхийлөгч Х.Баттулга 11.00 цагаас Нэгдүгээр төрөхийн хашаанд мод тарих бол УИХ-ын дарга М.Энхболд, Ерөнхий сайд Ц.Хүрэлсүх, УИХ-ын зарим гишүүд, Нийслэлийн Засаг дарга бөгөөд Улаанбаатар хотын захирагч С.Батболд, Ерөнхийлөгчийн Тамгын газрын дарга З.Энхболд, НЗДТГ-ны удирдлагууд, иргэд, байгууллага хамт олны төлөөлөл 11.00 цагт Үндэсний цэцэрлэгт хүрээлэнд мод тарих юм.

Энэ хавар Үндэсний цэцэрлэгт хүрээлэн цэвэр усны эх үүсвэр болох гүний худгийг хамгаалах хамгаалалтын зурвас хэлбэрээр 8 төрлийн 5000 орчим мод тарина.

Д.Өлзий

Сурталчилгаа
Монгол брэнд