Хяргас суманд эмнэг булгиулах, бугуйл шүүрэх тэмцээн боллоо

Орон нутагт | Увс
batkhuu@montsame.mn
2018-06-07 14:01:43
Увс /МОНЦАМЭ/. Монголын уламжлалт үндэсний спортын төрлүүд, уламжлалт тоглоом, зан үйл, ёс заншил, өв соёлыг өсвөр үеийнхэнд өвлүүлэн үлдээх зорилготой Үндэсний спортын аймгийн 6-р их наадмын эмнэг булгиулах, морь бугуйлдах, уурга шүүрэх тэмцээн өчигдөр Хяргас суманд боллоо.
Увс аймгийн Зүүн бүсийн сумдын хурдан морины уралдаантай хамтатган зохион байгуулсан энэхүү тэмцээнүүдэд 100 гаруй залуу оролцож, шилдгүүдээ шалгаруулсан байна. Морь бугуйлдах тэмцээний тэргүүн байрыг Батлан хамгаалахад туслах нийгэмлэгийн тамирчин Б.Бямбаа эзэлж, Хяргас сумын Б.Мягмарсүрэн, Д.Гантулга нар удаалсан байна. Харин уурга шүүрэх тэмцээнд Өндөрхангай сумын Б.Бүрэнтогтох, Батлан хамгаалахад туслах нийгэмлэгийн тамирчин Б.Бямбаа, Зүүнговь сумын Б.Тодбаяр нар тэргүүлжээ. Эмнэг булгиулах тэмцээнд Өндөрхангай сумын Б.Бүрэнтогтох, Тэс сумын Э.Амарбаян, Хяргас сумын Ц.Отгонбилэг нар аваргалсан байна. Тамирчдыг сум багийн дүнгээр байр эзлүүлэхэд Өндөрхангай сумын баг тамирчид тэргүүлж, Батлан хамгаалахад туслах нийгэмлэгийн болон Хяргас сумын баг тамирчид удаалжээ.
Тэмцээний тэргүүн байрын эзэд ирэх 8-р сард Улаабаатар хотноо зохион байгуулагдах Үндэсний спортын 6-р их наадамд аймгаа төлөөлөн оролцох юм байна. Энэхүү тэмцээнийг аймгийн БТСГ-аас Хяргас сумын ЗДТГ болон аймгийн Батлан хамгаалахад туслах нийгэмлэгтэй хамтран зохион байгуулжээ. Үндэсний спортын аймгийн 6-р их наадмын хүрээнд зохион байгуулагдах бусад тэмцээнүүд ирэх долоо хоногт Улаангом хотноо болно.
Б.Батхүү
Холбоотой мэдээ