top banner

“Тэнгэрийн ташуур” балетаар Атилла хааны баатарлаг түүхийг өгүүлнэ


2018-06-20 15:10:19
Зураг
Улаанбаатар /МОНЦАМЭ/ УДБЭТ-ын уран бүтээлчид энэ сарын 23, 24-нд Ардын жүжигчин Б.Жамьяндагвын цомнол, Хөгжмийн зохиолч, бүжиг дэглээч  СТА А.Батдэлгэрийн хөгжим “Тэнгэрийн ташуур” балетыг тайзнаа толилуулна.

Долоон жилийн дараа дахин тайзнаа толилуулах эл бүжгэн жүжигт энэ жил ОХУ-ын Перм хотын балетын сургуулийг төгссөн 11 шинэхэн бүжигчин тоглох гэж буйгаараа онцлогтой.

УДБЭТ-ын хамт олон 2011 оны 11дүгээр сарын 29-ны өдөр “Хүннү” гүрэн үүсэн байгуулагдсаны 2220 жилийн ой, Улс тунхагласны баярыг тохиолдуулан энэхүү балетыг анх тайзнаа тоглож байсан билээ.

Бүжгэн жүжигт Хүннүгийн удирдагч Атилла хааны эр зориг, сүр жавхаа, дэлхийг чичрүүлж явсан түүхийг харуулна. Атилла хаан Ромын хаадын нүүр рүү нулимж, нойргүй хонуулж явсан  бөгөөд тэднээс “Тэнгэрийн ташуур” хэмээх хочийг авсан гэдэг. Эл түүхэн үйл явдлыг уран сайхны, тэр дундаа бүжгэн жүжгийн хэлбэрээр амилуулжээ.

Тус бүтээлийн удирдаачаар АНУ-ын Стенфордын их сургуулийн профессор Жин Дон Кей ажиллаж байна. Түүний эхнэр Шейла, Монголын балетын талаар нийтлэл бичин “New-York Times” сэтгүүлд хэвлүүлдэг бөгөөд "УДБЭТ хөтөлбөр гарган дуурь, балетыг тасралтгүй тайзнаа  тавьдгаараа дэлхийн жишигт нийцсэн ховор театрт тооцогдоно. Уран бүтээлчид нь ачаалалтай ажиллан, сонгодог урлаг сонирхогчдод зориулан бүтээлээ толилуулдаг учир дэлхийн түвшинд гологдохгүй" хэмээн өнөөдөр болсон хэвлэлийн хурлын үеэр хэллээ. Түүнчлэн удирдаач Жин Дон Кей энэ балетыг зөвхөн Монголд төдийгүй дэлхийд гаргахаар төлөвлөснөө дуулгасан юм.

Бүжгэн жүжигт Атилла хааны дүрийг анх МУГЖ Мөнгөнхүлэг бүтээсэн бол энэ удаа түүний шавь нар болох УДБЭТ-ын гоцлооч Т.Хан-Очир, Д.Нацагдорж нар дүр бүтээх юм.

Э.Энхсаруул

Гэрэл зургийг Н.Батбаяр

 

Монгол брэнд