top banner

Фэйсбүүк ташаа мэдээллүүдийг устгана


2018-07-19 15:25:41
Зураг
НЬЮ-ЙОРК. /Theverge/. Хүчирхийлэлд хүргэж болзошгүй ташаа мэдээ мэдээлэл, хэрэглэгчдийг төөрөгдүүлсэн нийтлэлүүдийг устгаж эхэлсэн гэж Фэйсбүүк компани мэдэгдлээ.

"Биед хор уршиг учруулахад хүргэж болзошгүй ташаа мэдээллүүд фэйсбүүк цахим хуудсаар цацагдаж байна. Ийм төрлийн мэдээ мэдээллүүдийг устгах зорилгоор бид бодлогын өөрчлөлт хийж байгаа. Уг бодлогыг ирэх сараас хэрэгжүүлж эхэлнэ" гэж компани мэдэгдэлдээ дурдлаа.

Энэ бодлогын хүрээнд Фэйсбүүк компани ташаа эсвэл хэрэглэгчдийг төөрөгдүүлсэн нийтлэлүүд болон хүчирхийлэл, биед хор уршиг учруулах зорилго агуулсан мэдээ мэдээллийг хянаж эхлэх ажээ. Мөн “нийтлэлүүдийг хянахдаа тухайн орон нутгийн байгууллагууд тэр дундаа тагнуулын байгууллагуудтай хамтран ажиллана. Энэ аюул заналхийллийг хянах хамгийн зөв арга зам юм” гэж компани мэдэгдлээ.

Үүний зэрэгцээ Шри-Ланка дахь лалын шашинтнууд хордуулсан хоол хүнсийг буддын шашинтнуудад өгч байна гэсэн төрөөгдүүлсэн мэдээллийг шалгаж, устгасан гэж компани мэдэгдэлдээ дурдав. Энэ оны эхээр фэйсбүүк хуудсанд үзэн ядсан өнгө аяс бүхий нийтлэл гарсны улмаас хэд хэдэн хүчирхийллийн хэрэг гарсны дараа Шри-Ланкад фэйсбүүкийг түр хугацаагаар хаасан байна.
 
Д.Нямтулга

Монгол брэнд