"Оюу толгой"-н алтны үйлдвэрлэл 19 хувиар нэмэгджээ

Монголын мэдээ | Уул уурхай
ariunzaya@montsame.mn
2018-07-30 14:04:29
Улаанбаатар/МОНЦАМЭ/. “Оюу толгой” ХХК-ийн тээрмийн ашиглалтын түвшин дээшлэн, тэсэлгээний үйл ажиллагаа сайжирсантай холбоотой боловсруулсан хүдрийн хэмжээ өмнөх улирлаас 6.3 хувиар нэмэгджээ.

Тодруулбал хоёрдугаар улиралд үйлдвэрлэсэн баяжмал дахь зэсийн хэмжээ өмнөх улирлаас 1.5 хувь нэмэгдсэн нь тээрмийн ашиглалтын түвшин дээшилсэн, 6 дугаар үе шатны хүдрийн нөөцийн агуулга харьцангуй бага байсантай холбон тайларлаж байна.

Мөн хоёрдугаар улирлын тайлан мэдээгээр алтны үйлдвэрлэл 19 хувиар нэмэгдсэн нь тээрмийн ашиглалтаас гадна “4А” үе шатны хүдэр дэх агуулга, метал авалт нэмэгдсэнээс шалтаалсан байна. Туркойз Хилл компани “Оюу толгой” төслийг энэ онд 125-155 мянган тонн баяжмал дахь зэс, 240-280 мянган унци баяжмал дахь алт үйлдвэрлэнэ хэмээн төсөөлсөн бол хүдрийн хэмжээ 2018 оны эцэст 40 сая тоннд хүрэх төлөвтэй байгаа аж.

Гүний уурхайн хөндлөн нэвтрэлтийн ажил ахицтай явж байгаа бөгөөд тавдугаар босоо амыг амжилттай барьж гүйцэтгэн төлөвлөгөөт гүн болох 1,178 метр, 6.7 метрийн өргөнд хүрснийг тус компаниас мэдээллээ.

Оюутолгой 2020 оны дунд үеэс анхны хүдрийг биетийг олборлон эхэлж 2021 оноос тогтвортой үйлдвэрлэл эхлэхээр төлөвлөж байгаа юм.
Холбоотой мэдээ