Ulaanbaatar
Баярын өдрүүдэд нийтийг хамарсан хордлого гараагүй
МОНГОЛЫН МЭДЭЭ | ХУУЛЬМХЕГ-аас шинэ жилийн баярын өдрүүдийг угтан хүнсний гаралтай халдвар, хордлогоос сэргийлэх тухай зөвлөмж, сэрэмжлүүлэг өгч, урьдчилан сэргийлэх хяналт шалгалт хийсний дүнд нийтийг хамарсан хордлого гараагүй байна.
Баярын өмнөх өдрүүдэд хүнсний чиглэлийн үйл ажиллагаа эрхлэгч 828 аж ахуйн нэгж, байгууллага, 1200 гаруй иргэн, 2000 гаруй обьектыг шалган давхардсан тоогоор 2800 гаруй зөрчил илрүүлж, 77 хувийг газар дээр нь арилгав.
Холбогдох хууль, тогтоомж, стандарт, эрүүл ахуйн шаардлага зөрчсөн 12 газрын үйл ажиллагааг бүр болон түр зогсоож, чанар, аюулгүй байдлын шаардлага хангаагүй, хэрэглэх хугацаа хэтэрсэн хүнсний түүхий эд, бүтээгдэхүүнийг хураан авч устгажээ.
230 нэр төрлийн 680 дээжийг шинжлэхэд 26 буюу 3.8 хувь нь чанарын шаардлага хангаагүй бөгөөд бялуу, пирожен, мандарин, өргөст хэмх, усан үзэм, банш, гуляш, котлет зэрэгт гэдэсний бүлгийн эмгэг төрөгч, хөгц, мөөгөнцөр илэрч байлаа.
Улсын байцаагч нар урьдчилан сэргийлэх шалгалтын явцад хүнсний чиглэлийн үйл ажиллагаа эрхлэгчдийг сургалтад хамруулснаас гадна иргэдэд тухай бүр нь зөвлөмж өглөө. Цаашид хүнсний чанар, эрүүл ахуй, ариун цэврийн шаардлага хангаагүй, буруу шошголсон, хэрэглэж дуусах хугацаа хэтэрсэн, эрүүл мэндэд сөрөг нөлөө үзүүлэх бүтээгдэхүүн худалдах, худалдан авахгүй байхыг МХЕГ-ын “Зөвлөгөө, мэдээллийн төв” зөвлөж байна.
Н.Туяа
