Ulaanbaatar
УИХ-ын Ерөнхий нарийн бичгийн дарга Л.Өлзийсайхан ажлаа хүлээн авлаа
МОНГОЛЫН МЭДЭЭ | УЛС ТӨР
Улаанбаатар, 2025 оны арваннэгдүгээр сарын 29 /МОНЦАМЭ/. УИХ-ын нэгдсэн хуралдаанаар УИХ-ын Ерөнхий нарийн бичгийн даргын үүрэгт ажлаас Б.Баасандоржийг чөлөөлж, Хууль зүйн ухааны доктор, профессор, гавьяат хуульч Л.Өлзийсайханыг томиллоо.
Ерөнхий нарийн
бичгийн дарга асан Б.Баасандорж УИХ-ын Тамгын газрын удирдлагын багийн
гишүүдийн хамт шинээр томилогдсон Ерөнхий нарийн бичгийн дарга Л.Өлзийсайханд
баяр хүргэж, Тамгын газрын тамгыг гардуулан өгөв. Тэрбээр, өмнө нь
УИХ-ын Тамгын газрыг удирдаж байсан, парламентын онцлогийг сайн мэддэг, Үндсэн
хуулийн цэцийн гишүүнээр ажилласан туршлагатай, мэргэшсэн хуульчид ажлаа
хүлээлгэн өгч байгаадаа баяртай байна гээд амжилт хүслээ.
Ерөнхий нарийн
бичгийн дарга Л.Өлзийсайхан Монгол Улсын Үндсэн хуульд 2023 онд оруулсан
нэмэлтийг хэрэгжүүлж, анхны 126 гишүүнтэй УИХ-ын гарааг амжилттай тавьсанд
түүнд баяр хүргэж, талархал илэрхийлснийг УИХ-ын Хэвлэл мэдээллийн газраас мэдээлэв.
Хууль зүйн ухааны
доктор, професор Л.Өлзийсайхан 1998 оноос эхлэн УБИС, МУИС-ийн Хууль зүйн
сургуульд багшилж, УИХ-ын Тамгын газар, Шүүхийн ерөнхий зөвлөл, Нийслэл дэх
Захиргааны хэргийн анхан шатны шүүх, ЗГХЭГ-т удирдах ажил эрхэлж байсан бөгөөд
2019-2023 онд УИХ-ын Ерөнхий нарийн бичгийн даргаар ажиллаж байгаад Монгол
Улсын Үндсэн хуулийн цэцийн гишүүнээр томилогдон ажилласан, төрийн ажлын
арвин туршлагатай, мэргэшсэн хуульч юм гэж УИХ-ын Хэвлэл
мэдээллийн газраас мэдээлэв.
