Ulaanbaatar
Хуулийн төслийг эцсийн хэлэлцүүлэгт шилжүүлжээ
МОНГОЛЫН МЭДЭЭ | УЛС ТӨР
Улаанбаатар, 2025 оны арваннэгдүгээр сарын 29/МОНЦАМЭ/. УИХ-ын чуулганы өчигдрийн хуралдааны төгсгөлд Засгийн газраас энэ сарын 25-ны өдөр өргөн мэдүүлсэн Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төслийн анхны хэлэлцүүлгийг хийлээ.
УИХ-ын Эдийн засгийн байнгын хороо энэ сарын 27-ны өдрийн хуралдаанаараа дээрх хуулийн төслийн анхны хэлэлцүүлгийг хийж, энэ талаарх Байнгын хорооны санал, дүгнэлтийг УИХ-ын гишүүн Н.Батсүмбэрэл танилцуулав. Тэрбээр, Байнгын хороо хуулийн төслийн анхны хэлэлцүүлгийг УИХ-ын чуулганы хуралдааны дэгийн тухай хуулийн 39 дүгээр зүйлд заасныг баримтлан явуулсныг дурдаад УИХ-ын гишүүдээс хуулийн төслийн талаар саналын томьёолол гаргаагүй тул хуралдаан даргалагч хуулийн төслийг анхны хэлэлцүүлгээс эцэслэн батлах үе шат руу шилжүүлэх санал гаргасныг Байнгын хорооны хуралдаанд оролцсон гишүүдийн 70.6 хувь нь дэмжсэнийг онцоллоо.
Хэлэлцэж буй асуудалтай холбогдуулан УИХ-ын гишүүн
А.Ариунзаяа асуулт асуусны дараа Байнгын хорооны саналаар Стратегийн ач
холбогдол бүхий бүтээгдэхүүний хангамж, нийлүүлэлтийг дэмжих тухай хуулийн
төслийг анхны хэлэлцүүлгээс эцэслэн батлах үе шат руу шилжүүлэх горимын
саналаар санал хураахад, хуралдаанд оролцсон гишүүдийн олонх дэмжээгүй ажээ.
Иймд төслийг эцсийн хэлэлцүүлэгт бэлтгүүлэхээр Эдийн засгийн
байнгын хороонд шилжүүлснийг УИХ-ын Хэвлэл мэдээллийн газраас мэдээллээ.
