Ulaanbaatar
Олон улсын “Хүний эрхийг хамгаалагч эмэгтэйчүүдийн өдөр” тохиож байна
МОНГОЛЫН МЭДЭЭ | НИЙГЭМ
Улаанбаатар, 2025 оны арваннэгдүгээр сарын 29 /МОНЦАМЭ/. Олон улсын “Хүний эрхийг хамгаалагч эмэгтэйчүүдийн өдөр” тохиож байна.
Дэлхий нийтээр жил бүрийн 11 дүгээр сарын 29-нд “Хүний эрхийг хамгаалагч эмэгтэйчүүдийн өдөр”-ийг тэмдэглэн, хүний эрх хамгаалагчийг хамгаалах механизмыг сурталчилж, хүний эрхийн боловсролыг олон нийтэд түгээн таниулдаг.
Судалгаагаар 2019 онд дэлхий дахинаа хүний эрхийг хамгаалагч 300 гаруй хүн нас баржээ. Тэдний 85 хувь нь эрхэлж байсан ажлынхаа улмаас заналхийлэлд өртсөн бол 13 хувь нь эмэгтэй бөгөөд газар, уугуул иргэд, хүрээлэн буй орчны эрхийн төлөө тэмцсэний улмаас амиа алдсан байна. Хүний эрхийг хамгаалагч эмэгтэйчүүд хүчирхийлэл, заналхийлэлд өртөх нь их. Тэднийг хийж буй ажил, нийгэмд эзлэх үүрэг, байр суурьтай нь холбогдуулан нэр төрийг нь гутаан доромжилж, мөрдөн хавчиж, айлган сүрдүүлдэг ажээ.
Орон нутаг, бүс, үндэсний, олон улсын түвшинд бие даан эсвэл бусадтай эвлэлдэн нэгдэж, хүний эрх, үндсэн эрх чөлөөг хамгаалах, хэрэгжүүлэхийг дэмждэг хүнийг хүний эрхийг хамгаалагч гэдэг. Тэд арьс өнгө, хүйс, хэл, шашин шүтлэг, улс төр болон бусад үзэл бодол, нийгмийн гарал, өмч зэрэг аливаа байдлаар ялгаварлалгүй хүний эрхийн түгээмэл, нийтлэг байдлыг хүлээн зөвшөөрч, үйл ажиллагаагаа тайван замаар явуулдаг. Хүний эрх хамгаалагчид нийгмийн бүх л давхаргыг төлөөлдөг. Багш, хүний эрхийн зөрчлийн хохирогч, гэр бүлийнхэн нь, шүгэл үлээгч, байгаль хамгаалагч, хуульч, үйлдвэрчний эвлэл, хүний эрхийн үндэсний байгууллагын ажилтан, сэтгүүлч, эмнэлгийн мэргэжилтэн, төрийн албан хаагч, оюутан гээд хэн ч хүний эрхийг хамгаалагч байж болно.
Хүний эрхийг хамгаалагчид хүний
бүх эрхийг хамгаалахын төлөө байдаг ч зарим нь эмэгтэйчүүд, үндэстэн
ястан, шашин шүтлэг, хэлний цөөнх, хөгжлийн бэрхшээлтэй болон иргэн, улс төр, эдийн засаг, нийгэм, соёлын эрхийн чиглэлийн
тодорхой асуудлаар ажилладаг.
Улс орнууд 1998 онд хүний
эрх хамгаалагчдыг хамгаалах, улс орнуудын хүлээх үүрэг хариуцлагыг тусгасан
Хүний эрхийг хамгаалагчдын тунхаглалыг баталжээ. Үүнд “Хүн бүр хувь хүн,
бусадтай хамтран үндэсний болон олон улсын түвшинд хүний эрх, үндсэн эрх чөлөөг
хамгаалах, хэрэгжүүлэхэд хувь нэмрээ оруулах эрхтэй” гэж заажээ.
