Өнөөдрийг АСЕМ-ийн өдөр болгов
МОНГОЛЫН МЭДЭЭЗасгийн газрын хуралдаанаас гарсан зарим шийдвэрийн талаар Засгийн газрын Хэвлэл мэдээлэл, олон нийттэй харилцах албаны дарга Б.Цээпил өнөөдөр мэдээлэл хийлээ. Тэрбээр гуравдугаар сарын нэгнийг Засгийн газраас АСЕМ-ийн өдөр болгосон хэмээн мэдээллээ.
АСЕМ-ын Дээд түвшний 11 дүгээр уулзалт, АСЕМ-ийн 20 жилийн ойн арга хэмжээг зохион байгуулах ажлын хүрээнд энэ оны 3 дугаар сарын 1-нийг АСЕМ-ийн өдөр болгон зарлаж, улс даяар тэмдэглэн өнгөрүүлэхээр шийдвэрлэсэн байна. Люксембургийн Их Гүнт Улсад өнгөрсөн оны 11 дүгээр сард болсон АСЕМ-ийн Гадаад хэргийн сайд нарын 12 дугаар уулзалтаар АСЕМ-ийн талаарх олон нийтийн ойлголтыг бэхжүүлэх, үйл ажиллагаа, ач холбогдлыг сурталчлан таниулах, ард иргэдийн дунд сурталчилгааны цогц арга хэмжээг өргөнөөр зохион байгуулах зорилго бүхий “АСЕМ-ийн өдөр”-ийг жил бүрийн 3 дугаар сарын 1-нд тэмдэглэн өнгөрүүлэх тухай санаачилгыг гишүүн орнууд санал нэгтэй дэмжжээ.
Мөн АСЕМ-ийн Дээд түвшний анхны уулзалт 1996 оны 3 дугаар сарын 1-нд Бангкок хотноо зохион байгуулж байсан аж.
Монгол Улс АСЕМ-ын Дээд түвшний 11 дүгээр уулзалт, АСЕМ-ийн 20 жилийн ойн арга хэмжээг зохион байгуулах орны хувиар АСЕМ-ийн түүх, алсын хараа, онцлог, хэтийн зорилго, хандлагын талаарх дэлгэрэнгүй мэдээллийг олон нийтэд хүргэж, АСЕМ-ийн олон улс дахь ач холбогдлыг сурталчлан таниулах үүрэгтэй хэмээн үзэж, эл өдрийг зарлан тэмдэглэхээр болсон хэмээв.
Б.Туул