Ulaanbaatar
Монголын триатлоны холбооны ерөнхийлөгчөөр Ц.Сандуй дахин сонгогдлоо
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Монголын триатлоны холбооны IV бага хурал пүрэв гарагт /2022.06.02/ МҮОХ-ны байранд болж, 57 төлөөлөгч хүрэлцэн ирж оролцлоо.
Энэхүү
бага хурлаар Монголын триатлоны холбооны 2018-2022 оны үйл ажиллагааны болон
санхүүгийн тайланг хэлэлцэж, Монголын триатлоны холбооны 2022-2026 оны стратеги
төлөвлөгөөг баталсан байна.
Мөн
зохион байгуулалтын асуудал хэлэлцэж, холбооны ерөнхийлөгчөөр Монголын үндэсний
олимпийн хороо /МҮОХ/-ны Гүйцэтгэх зөвлөлийн гишүүн Ц.Сандуй, ерөнхий нарийн
бичгийн даргаар Б.Цагаанбаатар нар улиран сонгогджээ. Үүнээс гадна холбооныхоо Удирдах
зөвлөлийн бүрэлдэхүүнийг шинэчилжээ.
Хуралд МҮОХ-ны Тэргүүн дэд ерөнхийлөгч Ч.Наранбаатар оролцож, баяр хүргэн үг хэлжээ. Бага хурлын үеэр Монголын триатлоны анхны тамирчин М.Цэнгүүнийг Биеийн тамир, спортын тэргүүний ажилтан цол тэмдгээр, спортын дэд мастер Б.Зоригтыг МҮОХ-ны “Олимпын алдар одон”-гоор шагнасныг гардуулжээ.
