Ulaanbaatar
ЕВРО-2024: Англи, Испанийн шигшээ багууд аваргын төлөө тоглоно
ДЭЛХИЙН МЭДЭЭ | СПОРТ
БЕРЛИН, 2024 оны долоодугаар сарын 11 /DW/. Германд болж буй Европын хөл бөмбөгийн аварга шалгаруулах тэмцээний хагас шигшээгийн тоглолтод Английн шигшээ баг Нидерландын багийг 2:1-ээр хожсоноор аваргын төлөө Испанийн шигшээ багтай өрсөлдөхөөр боллоо. Дортмунд хотод өчигдөр болсон тоглолтыг 62 мянган хүн үзжээ.
Тоглолтын 7 дахь минутад Нидерландын шигшээ баг тооны харьцааг нээжээ. Хагас хамгаалагч Хави Саймонс талбайн голд Деклан Райсаас бөмбөгийг булаан авч, улмаар торгуулийн талбайн захаас өрсөлдөгчийнхөө хаалганы дээд булан руу хүчтэй, оновчтой цохисныг хаалгач Жордан Пикфорд хааж чадсангүй.
Английн шигшээ баг 10 минутын дараа тооны харьцааг тэнцүүлсэн байна. Мюнхений “Бавария” клубийн довтлогч Харри Кейн 11 метрийн торгуулийн цохилтыг оновчтой гүйцэтгэжээ.
Тоглолтын 80 дахь минутад Английн багийн баруун жигүүрийн хамгаалагч Букайо Сака багийн ахлагч Кайл Уолкерын дамжуулсан бөмбөгийг Нидерландын хаалганд оруулсан хэдий ч VAR-аар шалгасны дараа отон байсан тул гоолыг тооцоогүй байна.
Гэсэн хэдий ч Английн баг үндсэн цагийн сүүлийн минутад (90+1) шийдвэрлэх гоолыг орууллаа. Тоглолтын хувь заяаг сэлгээгээр талбайд гарсан "Астон Вилла" клубийн довтлогч Олли Уоткинс шийджээ.
“Евро-2024” тэмцээний шувтаргын тоглолт 7 дугаар сарын 14-ний ням гарагт Берлин хотын Олимпын цэнгэлдэх хүрээлэнд болно. Английн шигшээ баг хоёр дахь удаагаа Европын аварга шалгаруулах тэмцээний финалд шалгарлаа.
