Ulaanbaatar
Өвлийн Олимпын галт бамбарын буухиа эхэллээ
ДЭЛХИЙН МЭДЭЭ | СПОРТ
РОМ, 2025 оны арванхоёрдугаар сарын 7 /NHK/. “Милан-Кортина-2026” өвлийн Олимпын галт бамбарын буухиа бямба гарагт Ром хотоос эхэллээ.
Олимпын галыг 11 дүгээр сард Грекийн Олимпиа хотод асаасны дараа пүрэв гарагт Италид авчирсан юм. Энэхүү галт бамбарыг буухиалсан анхны тамирчин нь 2016 оны Рио-де-Жанейрогийн Олимпын эрэгтэйчүүдийн 1500 м-ийн чөлөөт сэлэлтийн төрөлд алтан медаль хүртсэн усанд сэлэгч Грегорио Палтриниери байв.
Ватикан хотын Гэгээн Петрийн талбай зэрэг буухианы маршрутын дагуу цугласан олон алга ташин баяр хүргэж байлаа. Нэгэн эмэгтэй галт
бамбарын буухиаг анх удаа үзэж байгаагаа илэрхийлээд, сэтгэл нь маш их сэтгэл
хөдөлсөн хэмээн ярьжээ. Тэрбээр Олимпын наадмыг эх орондоо зохион байгуулж
байгаад маш их баяртай байгаагаа нэмж хэлсэн байна.
Галт бамбарыг буухиалагчдын дунд 2021 оны Токиогийн Олимпын
эрэгтэйчүүдийн өндрийн харайлтын аварга Жанмарко Тамбери мөн байлаа. Тэрбээр бамбарыг
буухиалж буй эхний хүмүүсийн нэг болсон нь үнэхээр гайхалтай байсан хэмээгээд, энэ
нэр хүндтэй үүргийг хүлээхээр сонгогдсондоо бахархалтай байгаагаа хуваалцсан байна.
Наадмын зохион байгуулах хорооноос мэдээлснээр, галт
бамбарыг 10 мянга орчим хүн буухиалах бөгөөд Дэлхийн өвийн дурсгалт газрууд
болон Флоренц, Венец зэрэг Италийн алдартай газруудаар дамжин өнгөрнө. Ийнхүү галт
бамбарын буухиа ирэх оны хоёрдугаар сарын 6-нд Милан хотноо болох нээлтийн
ёслол хүртэл үргэлжлэх юм.
