Нийслэлийн 53 дугаар сургуулийн өргөтгөлийн шав тавив

МОНГОЛЫН МЭДЭЭ | БОЛОВСРОЛ
boloroo8136@gmail.com
2019-03-26 14:27:30

Улаанбаатар /МОНЦАМЭ/. Нийслэлийн ерөнхий боловсролын 53 дугаар сургуулийн өргөтгөлийн барилгын шав тавих ёслол өнөөдөр боллоо.


БСШУСЯ-ны Төрийн нарийн бичгийн дарга Б.Баярсайхан хэлэхдээ, “Монгол Улсын Засгийн газраас дэвшүүлсэн гурван ээлжээр хичээллэх явдлыг арилгах зорилтыг хэрэгжүүлэхэд энэ барилгын ажил хувь нэмрээ оруулж, багш, сурагчдын ачааллыг бууруулна” гэдгийг онцлоод 2020 он гэхэд хоёр сургуулийн барилга, мөн тооны өргөтгөлийн барилга хүлээлгэн өгөхөөр ажиллаж буй Япон Улсын Засгийн газар, “Жайка” олон улсын байгууллага болон төслийн гүйцэтгэгч, зөвлөх байгууллагуудад талархал илэрхийлэв. 


Япон Улсын Засгийн газрын буцалтгүй тусламжийн хөрөнгөөр “Бага боловсролын барилга, тоног төхөөрөмжийг сайжруулах” төсөл 1999-2013 онд дөрвөн үе шатаар хэрэгжиж дууссан юм. Уг төслийн хүрээнд Улаанбаатар хотод нийт 45 сургууль болон өргөтгөлийг шинээр барьж, ашиглалтад оруулж, сургуулиудын хүчин чадлыг 22.0 мянгаар нэмэгдүүлсэн байна. 

Одоо хэрэгжиж байгаа тав дахь шатны төслийн хүрээнд өнөөдөр шаваа тавьж буй 53 дугаар сургуулийн өргөтгөлөөс гадна Чингэлтэй дүүргийн 7 дугаар хороонд 720, Хан-Уул дүүргийн 75 дугаар сургуулийн хуучин барилгыг буулгаж, 920 хүүхдийн хүчин чадалтай сургууль, Налайх дүүргийн 109 дүгээр сургуулийн 320 хүүхдийн өргөтгөлийн барилга тус тус ашиглалтад орох юм.


Эдгээр сургуулийн онцлог гэвэл байгаль орчинд ээлтэй, хөгжлийн бэрхшээлтэй хүүхэд суралцах боломжтой, байгалийн гамшгийн үед хоргодох байр болгон ашиглах боломжтой олон улсын стандартад нийцсэн гэдгийг Япон Улсаас Монгол Улсад суугаа Элчин сайд, ноён Масато Такаока нээлтийн үгэндээ онцлов. 

Нийслэлийн хэмжээнд хамгийн олон хүн амтай Баянзүрх дүүрэгт байрлах 53 дугаар сургуульд тус дүүргийн 8, 13, 16, 19, 24 дүгээр хорооны айл өрхийн 2480 гаруй сурагч суралцаж байгаагаас 3 бүлгийн 142 сурагч гуравдугаар ээлжээр хичээллэж байгаа аж.


Холбоотой мэдээ