Жо Байден ерөнхийлөгчийн сонгуулийн сунгаанд өрсөлдөнө
ДЭЛХИЙН МЭДЭЭ | УЛС ТӨРВАШИНГТОН. /BBC/. АНУ-ын Дэд Ерөнхийлөгч асан Жо Байден 2020 оны ерөнхийлөгчийн сонгуулийн Ардчилсан намын сунгаанд өрсөлдөнө гэдгээ пүрэв гарагт албан ёсоор олон нийтэд мэдэгдэв.
АНУ-ын олон нийтийн хэвлэл мэдээллийн хэрэгслүүдэд нийтэлсэн дүрс бичлэгт,
Ж.Байден Ерөнхийлөгч Дональд Трампын бодлогуудыг хурцаар шүүмжилсэн байна. Мөн
тэрбээр, хэрэв Д.Трамп улиран сонгогдвол, АНУ-ын онцлог шинж чанарыг үндсээр нь
өөрчлөх болно хэмээгээд, үүнийг зүгээр хараад сууж чадахгүй гэж хэлжээ.
Өдгөө 76 настай Ж.Байден Делавэр муж улсын сенатчаар 36 жил ажиллаж, Дэд Ерөнхийлөгчийн албыг 2009-2017 онд хашиж байсан юм. Тэрбээр Ардчилсан намын сунгаанд оролцохоор нэрээ дэвшүүлсэн 20 дох хүн болсон бөгөөд энэхүү сунгаанд сенатч Элизабет Уоррен, Камала Харрис, Берни Сандерс тэргүүтэй төлөөлөгчид багтаж байна.