Улаанбаатар
Airbus-ын онгоцнуудын программ хангамжийг шинэчилнэ
ДЭЛХИЙН МЭДЭЭ | НИЙГЭМ
ЛОНДОН, 2025 оны арваннэгдүгээр сарын 29 /BBC/. Европын нисэх онгоц үйлдвэрлэгч Airbus корпорацид үйлдвэрлэсэн олон мянган онгоцонд программын болон тоног төхөөрөмжийн шинэчлэл хийх шаардлагатай болсныг тус компанийн удирдлага мэдэгдлээ.
Учир нь, нарны хурц гэрэл нь
байршил тогтоох системийн өгөгдлүүдийг гажуудуулах магадлалтай байгаа ажээ.
Нэг сарын өмнө буюу 10 дугаар
сарын 30-нд АНУ-ын Флорида муж улсад нисэж байсан Jet Blue компанийн A320 нисэх
онгоцонд ийм асуудал үүссэний улмаас өндрөө огцом алдаж, ослын буулт хийжээ. 15
зорчигч гэмтэл авсан байна.
Ийм доголдол хамгийн түгээмэл
загвар болох A320, мөн A318, A319 ба A321 загварын онгоцуудад гарах магадлал
өндөр ажээ. Дэлхий даяар эдгээр загварын 6 мянга орчим онгоц /дэлхий дээрх нийт
онгоцны 50 орчим хувь/ нисэж байгаагаас 5100 орчим онгоцны программ хангамжинд
бага зэргийн шинэчлэл хийх бөгөөд үүнд 3 цаг орчмын хугацаа зарцуулах бололтой.
Харин хуучин онгоцнуудын аппарат хэрэгслийг солих шаардлагатай учраас түр хугацаанд
зарим нислэг цуцлагдах тул Airbus компани үйлчлүүлэгчдээсээ хүлцэл өчсөн байна.
Юуны түрүүнд иргэний агаарын тээврийн
Wizz Air, Air India, Air New Zealand, British Airways компаниуд зарим онгоцоо
ашиглалтаас түр гаргахад хүрэх бололтой. Easyjet компани мэдэгдэхдээ “олон
онгоцонд шинэчлэлийг хэдийн хийсэн тул бямба гаргаас нислэг хэвийн үргэлжилнэ”
гэсэн байна.
Мөн American Airlines компанийн
340 онгоц шинэчлэлд хамрагдсан бөгөөд уг ажиллагаа өнөө маргаашдаа дуусах ажээ.
