Улаанбаатар
Нигерийн шигшээ баг 9 дэх удаагаа хүрэл медаль хүртлээ
ДЭЛХИЙН МЭДЭЭ | СПОРТ
МОСКВА, 2026 оны нэгдүгээр сарын 18 /РИА Новости/. Мароккод үргэлжилж буй Африкийн цомын тэмцээний
гуравдугаар байрын төлөөх тоглолтод Нигери улсын хөл бөмбөгийн шигшээ баг
Египетийн багийг хожсоноор хүрэл медаль хүртлээ.
Тоглолтын үндсэн цаг 0:0 харьцаагаар дууссан тул торгуулийн цохилтоор ялагчийг
тодруулахад нигеричууд 4:2-оор давамгайлжээ. Египетийн шигшээгээс Английн “Ливерпүүл”,
“Манчестер Сити” багуудад тоглодог Мохамед Салах, Омар Мармуш нар 11 м-ийн цохилтыг алдсан байна. Нигерийн шигшээгийн
бүрэлдэхүүнд өмнө нь Москвагийн ЦСКА-д тоглож байсан, 2024 оноос Испанийн “Севилья”-д
тоглож буй 25 настай хагас хамгаалагч Чидера Эжуке багтжээ.
Египетийн багийг хожсоноор нигеричүүд Африкийн цомын хүрэл медалийг 9 дэх удаагаа
хүртэж байна. Тэд хамгийн сүүлд 2019 онд III байрт шалгарчээ. Нигерийн шигшээ түүхэндээ 3 удаа
Африкийн цомыг өргөж, 5 удаа мөнгөн медаль хүртсэн байна.
Хөл бөмбөгийн Африкийн цомын аварга шалгаруулах тэмцээн өнөөдөр буюу ням
гарагт өндөрлөнө. Финалд Сенегалын шигшээ баг ба талбайн эзэн мароккочууд үлдээд
байна.
