Улаанбаатар, 2025 оны арваннэгдүгээр сарын 29 /МОНЦАМЭ/. УИХ-ын чуулганы өчигдрийн хуралдаанаар “Монгол Улсыг 2026-2030 онд хөгжүүлэх таван жилийн үндсэн чиглэл батлах тухай” УИХ-ын тогтоолын төслийн анхны хэлэлцүүлгийг хийв. 

Тогтоолын төслийн талаарх Эдийн засгийн байнгын хорооноос бэлтгэсэн зарчмын зөрүүтэй 210 саналын томьёолол тус бүрээр санал хураав. Тухайлбал, “Монгол Улсыг 2026-2030 онд хөгжүүлэх үндсэн чиглэл” батлагдахтай холбогдуулан Улсын хөрөнгө оруулалтын хөтөлбөрийг боловсруулах аргачлалыг хуулиар тогтоох, Монгол Улсыг хөгжүүлэх таван жилийн үндсэн чиглэлийг боловсруулах, төлөвлөх, батлах, үнэлгээ хийх, тайлагнах цаглавар, УИХ-аар хэлэлцүүлэхтэй холбоотой хуулиудын уялдааг хангаж, шаардлагатай хуулийн төслийг боловсруулан 2026 оны хаврын чуулганы хугацаанд УИХ-д өргөн мэдүүлэхийг Засгийн газарт даалгах ажлын хэсгийн саналыг хуралдаанд оролцсон гишүүдийн 54 хувь нь дэмжлээ.

УИХ-ын Хэвлэл мэдээллийн газрын мэдээлснээр төслийн “Өмнөтгөл” хэсгийг “Монгол Улсыг 2026-2030 онд хөгжүүлэх таван жилийн үндсэн чиглэлд үндэсний, салбарын, төсвийн ерөнхийлөн захирагчдын болон тэдгээрийн хэрэгжүүлж буй хөтөлбөрийн түвшинд тулгамдаж буй асуудлыг тогтоож, шийдвэрлэх арга зам, бий болох үр дүн, хэмжих шалгуурыг тодорхойллоо. Шалгуур үзүүлэлтийг НҮБ-ын Тогтвортой хөгжлийн зорилгын тус үндсэн чиглэлийг хэрэгжүүлэхэд чиглэсэн хөрөнгө оруулалтын төсөл, төсөв, санхүүгийн тооцоог заасан. Үндсэн чиглэл нь Засгийн газар, Засаг даргын үйл ажиллагааны хөтөлбөр, улс, аймаг, нийслэл, хотын хөгжлийн жилийн төлөвлөгөө, улс, орон нутгийн төсөв, байгууллагын стратеги, жилийн гүйцэтгэлийн төлөвлөгөө, төрийн албан хаагчийн жилийн гүйцэтгэлийн төлөвлөгөө зэрэг баримт бичгийн суурь болно. Үндсэн чиглэлд тодорхойлсон үр дүнг бодлого, төлөвлөлтийн эдгээр баримт бичигт тусгаж, зорилтот үр дүнг хангахад чиглэсэн арга хэмжээг хэрэгжүүлнэ. Үндсэн чиглэл нь “Шинэ итгэл-Эрс шинэтгэл”-д зорьсон “Хүний хөгжил”, “Нийгмийн хөгжил, үндэсний нэгдмэл үнэт зүйл”, “Эдийн засаг, дэд бүтцийн хөгжил”, “Байгаль орчин, ногоон эдийн засаг”, “Төрийн бүтээмж, засаглал”, “Бүсийн хөгжил”, “Үндэсний өрсөлдөх чадвар”, “Шинжлэх ухаан, технологи, хиймэл оюун” гэсэн бодлогын 8 чиглэлээс бүрдэх бөгөөд энэ хүрээнд үндэсний 10 үр дүнд хүрэхээр төлөвлөв” гэж өөрчлөн найруулахыг хуралдаанд оролцсон гишүүдийн 56.3 хувь нь дэмжив.

Түүнчлэн төслийн 1 дүгээр хавсралтын 1.2 дахь заалтыг “Хөдөлмөрийн харилцаа, цалин хөлс, нийгмийн даатгалын уялдааг сайжруулж, зохистой хөдөлмөр эрхлэлтийг нэмэх замаар дундаж давхаргын эзлэх хувийг 20 хувиар нэмнэ” гэж,  төслийн 1 дүгээр хавсралтын 1.1 дэх заалтыг “1.1.Боловсролын чанар, хүртээмжийн ялгааг арилгаж, эрүүл мэндийн тогтолцооны гүйцэтгэлийн хүрээг тогтоож, хүн төвтэй, хүртээмжтэй, чанартай, санхүүгийн эрсдэлгүй тусламж, үйлчилгээг иргэн бүрд тэгш хүргэж, дундаж наслалтыг 2 насаар нэмж, хөдөлмөрийн зах зээлийн эрэлттэй нийцсэн хүний нөөцийг бэлтгэн, хүний хөгжлийн үзүүлэлтийг 0.85 оноонд хүргэнэ” гэж өөрчлөн найруулах ажлын хэсгийн саналыг хуралдаанд оролцсон гишүүдийн олонх тус тус дэмжлээ.

Мөн энэ үеэр УИХ-ын гишүүн, ажлын хэсгийн ахлагч Г.Тэмүүлэн тогтоолын төслийг хэлэлцүүлэгт бэлтгэхдээ холбогдох хууль, зарчмын дагуу хандсаныг онцлоод суурь судалгаагүй, төсөлд ТЭЗҮ хийгээгүй асуудлыг үндсэн чиглэлд тусгах боломжгүй гэв. Иймд санхүүжилтийн эх үүсвэр, ТЭЗҮ, зураг төсөл боловсруулах шаардлагатай төсөл, арга хэмжээг хасаж буйг ажлын хэсгийн ахлагч дурдаад хөрөнгө оруулалтыг нэмэхтэй холбоотой бүх саналаар санал хураах шаардлагагүйг мэдэгдэв. Хуралдаан даргалагч зарчмын зөрүүтэй зарим саналд гүйцээн боловсруулах чиглэлийг ажлын хэсэгт өгснөөр тогтоолын төслийг эцсийн хэлэлцүүлэгт бэлтгэхээр Эдийн засгийн байнгын хороонд шилжүүлсэн.

Энэ өдөр УИХ-ын Эдийн засгийн байнгын хороо дахин хуралдаж, “Монгол Улсыг 2026-2030 онд хөгжүүлэх таван жилийн үндсэн чиглэл батлах тухай” УИХ-ын тогтоолын төслийн эцсийн хэлэлцүүлгийг, мөн чуулганы нэгдсэн хуралдаанаар тогтоолын төслийн эцсийн хэлэлцүүлгийг  хийв. 

Байнгын хорооны санал, дүгнэлттэй холбогдуулан асуулт асууж, үг хэлэх гишүүн байгаагүй тул  тогтоолын төслийн талаарх зарчмын зөрүүтэй саналаар санал хураав. “Монгол Улсыг 2026-2030 онд хөгжүүлэх таван жилийн үндсэн чиглэл батлах тухай” УИХ-ын тогтоолын төслийг батлахыг хуралдаанд оролцсон гишүүдийн 56.1 хувь нь дэмжлээ.