Ulaanbaatar
Дипломат харилцаа тогтоосны 35 жилийн ойг тэмдэглэв
МОНГОЛЫН МЭДЭЭ | УЛС ТӨР
Улаанбаатар, 2025 оны арваннэгдүгээр сарын 29 /МОНЦАМЭ/. Монгол Улсаас БНСУ-д суугаа Элчин сайдын яамнаас хоёр улсын хооронд дипломат харилцаа тогтоосны 35 жилийн ойн хүндэтгэлийн үйл ажиллагааг зохион байгууллаа.
Ойн баярыг нээж Элчин сайд С.Сүхболд үг хэлэхдээ, Их
эзэн богд Чингис хааны мэндэлсний 863 жил, Монгол бахархлын өдөр, эртний
сурвалж бичигт тэртээх 995 онд Кидан гүрэн Гуулин улстай харилцаж, Чингис хааны
үед 1219 онд “Хоёр улс үүрдийн ахан дүүс болж, үеийн үед энэ өдрийг бүү
умартъя” хэмээж нөхөрсөг тангараг тавьж, холбоотны харилцаа тогтоож байсан
тухай онцолжээ.
Хоёр улс Стратегийн түншлэлийн харилцаанд тулгуурлан долоон
хоногт 100 гаруй нислэг үйлдэж, хоёр улсын худалдааны эргэлт 670 сая ам.доллар
хүрч, 17 мянга гаруй монгол оюутан суралцаж, жилдээ 150 мянга орчим хүн зорчиж,
“Ногоон хэрэм”, “Газрын ховор метал”, “Үндэсний оношилгоо, эмчилгээний төв”, “Шийдвэр
гаргах түвшинд эмэгтэйчүүдийн оролцоог нэмэх” зэрэг төсөл, хөтөлбөр хэрэгжүүлж,
ховор метал, хиймэл оюун, дэвшилтэт шинэ технологийн салбарыг өргөжүүлж байгааг
дурдав.
Монгол Улсын Ерөнхийлөгчийн Ахлах зөвлөх Н.Хүрэлбаатар, БНСУ-ын
Гадаад хэргийн яамны Олон нийттэй харилцах Дэд сайд И Жэ Үн баярын мэндчилгээ
хүргэж, Үндэсний Ассамблейн гишүүн, Солонгос-Монголын Парламентын бүлгийн дарга
Жин Сон Жун оролцож, мэндчилгээ дэвшүүлснийг Гадаад харилцааны яам мэдээллээ.
Хүндэтгэлийн ёслолд Монгол Улсын Хөдөлмөрийн баатар, Ардын
жүжигчин А.Долгор, МУГЖ Б.Гомбо-Очир, дуурийн дуучин Ан Жү Ын, Сэжун театрын дуурийн
дуучид Юү Хён Үг, Жу Хён Э, “ANU Music” хүүхдийн хийл хөгжмийн ансамбль ая
дууны мэндчилгээ дэвшүүлж, уран бүтээлч Ц.Өлзийхутаг, Н.Ганзориг морин хуур,
бийр бичиг хосолсон үзүүлбэр үзүүлж, монголын соёл, урлагаа сурталчлав.
Энэ үеэр дипломат харилцаа тогтоосны 35 жилийн ойн гэрэл зургийн үзэсгэлэн дэлгэсэн бөгөөд дээрх үйл ажиллагаанд суугаа улсын төрийн байгууллага, гадаад улсын дипломат төлөөлөгчийн газар, төрийн бус байгууллага, хувийн хэвшлийн 450 гаруй зочин төлөөлөгч оролцжээ.
