Ulaanbaatar
Авлигатай тэмцэх олон улсын өдөр тохиож байна
МОНГОЛЫН МЭДЭЭ | НИЙГЭМ
Улаанбаатар, 2025 оны арванхоёрдугаар сарын 9 /МОНЦАМЭ/. НҮБ-ын Ерөнхий ассамблей 2003 оны аравдугаар сарын 31-ний өдөр хуралдаж, 58/4 дүгээр тогтоолоор жил бүрийн арванхоёрдугаар сарын 9-нийг “Авлигын эсрэг олон улсын өдөр” болгон тэмдэглэж байхаар шийдвэрлэсэн.
Улс орнуудын удирдагчид 2003 онд Авлигын эсрэг НҮБ-ын Конвенцод нэгдэн, гарын үсэг зурах бага хурлыг Мексикийн Мерида хотноо зохион байгуулжээ. Өндөр албан тушаалтнууд гарын үсгээ зурсан энэ өдрийг “Авлигын эсрэг олон улсын өдөр” хэмээн НҮБ-аас албан ёсоор тунхагласан юм.
Харин манай улс Авлигын эсрэг олон улсын өдрийг 19 дэх жилдээ тэмдэглэж байна. Өөрөөр хэлбэл, Монгол Улс 2005 оны аравдугаар сарын 27-ны өдөр НҮБ-ын Авлигын эсрэг Конвенцыг соёрхон баталснаар нэгдэн орсон түүхтэй. Авлигатай тэмцэх газар 2019-2025 онд авлигын 11006 гэмт хэргийг шалгахдаа гурван 3 их наяд төгрөгийн хохирлыг мөрдөн шалгах ажиллагааны явцад нөхөн төлүүлж, улсын төсөвт төвлөрүүлсэн байна. Тэгвэл авлигын улмаас гадаад улсад хулгайлагдсан хөрөнгийг буцаах чиглэлээр хүчин чармайлт гаргасны үр дүнд 13.9 сая ам.долларын хөрөнгийг улсдаа буцаан авчирчээ.
НҮБ-ын Конвенц нь авлигын шалтгааныг арилгах, үр нөлөөг бууруулах цогц арга хэмжээг тусгасан, дэлхий даяар авлигатай тэмцэх гол хэрэгсэл хэмээн үздэг бөгөөд түүнд нэгдсэн улс орнууд энэ өдрийг угтан олон нийтийн дуу хоолойг сонсох, Конвенцод тусгасан үүргийг нийгэмд таниулах зорилготой юм. Авлигын эсрэг НҮБ-ын далбаан дор нэгдсэн улс орнууд энэ өдрийг угтан авлигын хор уршгийг олон нийтэд таниулах, авлигатай тэмцэх чиглэлд иргэд, олон нийтийн оролцоог нэмэгдүүлэх, олон нийтийн дуу хоолойг сонсох, Авлигын эсрэг конвенцид тусгасан үүргүүдийг нийгэмд таниулах үүрэг хүлээсэн билээ.
