Ерөнхийлөгчийн шүүгч нарыг томилох эрхийг хасах хуулийн төслийг дэмжлээ

МОНГОЛЫН МЭДЭЭ | УЛС ТӨР
munkhbaatar@montsame.gov.mn
2021-10-22 10:38:01
@s_munkhbaatar

Улаанбаатар /МОНЦАМЭ/. УИХ-ын чуулганы өнөөдрийн нэгдсэн хуралдаанаар, Ерөнхийлөгчийн тухай хуульд нэмэлт, өөрчлөлт оруулах тухай хуулийн анхны хэлэлцүүлгийг явуулав. 


Төслийн анхны хэлэлцүүлэг хийсэн талаарх Хууль зүйн байнгын хорооны санал, дүгнэлтийг УИХ-ын гишүүн Ц.Мөнхцэцэг танилцуулав. Монгол Улсын Ерөнхийлөгчийн тухай хуулийн 12 дугаар зүйлийн 12.18 дахь хэсэгт "Шүүхийн ерөнхий зөвлөлийн дарга, гишүүдийг хуульд заасны дагуу томилж, чөлөөлнө”  гэсэн нь Шүүхийн тухай хуультай зөрчилдөж байгаа юм. Тиймээс дээрх хэсгийг хасахаар хуулийн төслийг боловсруулсан юм. Байнгын хороо энэ сарын 19-нд Хуульчийн эрх зүйн байдлын тухай хуультай хамт өргөн мэдүүлсэн дээрх хуулийн төслийн анхны хэлэлцүүлгийг явуулсан бөгөөд, зүйл бүрээр нь хэлэлцэн, дэмжсэн байна. 


Байнгын хорооны санал, дүгнэлттэй холбогдуулан асуулт асууж, хариулт авах гишүүн байсангүй. Иймд Байнгын хороо дэмжсэн төслийн зарчмын зөрүүтэй саналын томъёоллоор санал хураав. Тухайлбал, "Энэ хуулийг 2021 оны 11 дүгээр сарын 5-ны өдрөөс эхлэн дагаж мөрдөнө" гэсэн С.Бямбацогт гишүүний гаргасан саналыг гишүүдийн олонх дэмжлээ. Иймд төслийг эцсийн хэлэлцүүлэгт бэлтгүүлэхээр УИХ-ын хууль зүйн байнгын хороонд шилжүүлэв. 

Холбоотой мэдээ