Улаанбаатар
Агаарын чанарын индекс 400-гаас илүү байвал эрүүл мэндэд сөргөөр нөлөөлдөг гэв
МОНГОЛЫН МЭДЭЭ | НИЙГЭМ
Улаанбаатар, 2024 оны арванхоёрдугаар сарын 19 /МОНЦАМЭ/. Агаарын чанарын индекс 401-500 зааж байвал маш их бохирдолтой буюу хүний эрүүл мэндэд сөргөөр нөлөөлдгийг ЦУОШГ-аас мэдээлэв.
Агаарын чанарын мэдээллийг
agаar.mn сайтад цаг тутам шинэчилж байна. Чанарын
индекс 0-50 зааж байвал цэвэр, хүний
эрүүл мэндэд сөрөг нөлөөгүй, 51-100
бол хэвийн буюу стандартын шаардлага хангасан гэж
үздэг байна. Энэ индекс 101-200-гийн
хооронд байвал бага бохирдолтой, хэт мэдрэг хүмүүс амьсгалын замын шинж
тэмдэг илрэх магадлалтай аж. Харин 201-300
байвал бохирдолтой, 301-400 бол их
бохирдолтой гэж үзэх нь. Ингэхдээ
техникийн ерөнхий шаардлага, хот
суурин газрын гадаад орчны агаарт байх бохирдуулах бодисын хүлцэх хэм хэмжээ гэсэн стандарт ашигладаг байна.
“Агаарын чанарыг хэмжихэд хугацаа маш чухал байдаг. Агаарын чанарын стандартыг олон улсын жишгээр, хамгийн богинодоо 24 цагийн мэдээллийг нэгтгэж гаргадаг. Манай улсад хүхэрлэг хийг 20 минут, 24 цаг, нэг жил гэсэн хугацаагаар хэмжиж байгаа. Тоос тоосонцорыг 24 цаг хэмжиж байж нарийвчилсан мэдээлэл гарах боломжтой”-г ЦУОШГ-ын Байгаль орчин, хэмжил зүйн төв лабораторийн хэлтсийн дарга Б.Бархасрагчаа танилцууллаа.
