Улаанбаатар
БУЛГАН: “Тэрбум мод” хөтөлбөрийг эрчимжүүлэх санамж бичигт гарын үсэг зурлаа
ОРОН НУТГИЙН МЭДЭЭ | БУЛГАН
Булган, 2024 оны арванхоёрдугаар сарын 29 /МОНЦАМЭ/. Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнийг эрчимжүүлэх үе шатны хүрээнд 21 аймагт “Тэрбум мод” цэцэрлэгт хүрээлэн байгуулах ажил Булган аймгаас эхэлж байна.
Уг ажлын хүрээнд Монгол Улсын
Ерөнхийлөгчийн орон тооны бус зөвлөх З.Мөнхбат, "Тэрбум мод" төрийн
бус байгууллагын төлөөлөгчид тус аймагт ажиллан хамтын ажиллагааны санамж
бичиг байгуулж, аймгийн ИТХ-ын дарга Ш.Насандулам, аймгийн Засаг дарга
Д.Пүрэв-Очир, Монгол Улсын Ерөнхийлөгчийн орон тооны бус зөвлөх, "Тэрбум мод" төрийн бус байгууллагын төлөөлөгчид хамтын ажиллагааны санамж бичигт гарын үсэг
зурлаа.
Аймгийн Засаг дарга Д.Пүрэв-Очир, “Монгол улсыг манлайлж "Тэрбум
мод" цэцэрлэгт хүрээлэн байгуулах хөдөлгөөнд нэгдэх зорилго, зорилт тавин
ажиллаж байна. Энэхүү зорилгын хүрээнд “Тэрбум мод” цэцэрлэгт хүрээлэн байгуулах ажлын эхлэл тавигдаж байгаад баяртай байна” хэмээн хэлсэн юм.
“Анхдагч, алдартны өлгий Булган аймгаас энэхүү бүтээн байгуулалтын ажил эхэлж буйд таатай байна. Анхдагч байна гээд хамгийн том бэрхшээл, саадыг даван туулдаг. Энэ хэрээр туршлага сууж бусдадаа үлгэр жишээ болно. Анхдагчдыг төрүүлдэг ард түмэн дахин анхдагч болж байгаад баяр хүргэе” хэмээн Монгол улсын Ерөнхийлөгчийн орон тооны бус зөвлөх З.Мөнхбат хэлсэн үгэндээ онцолсон юм.
