Улаанбаатар
Нарны гүүрийн урд хэсгийн авто замын хөдөлгөөнийг өөрчилнө
МОНГОЛЫН МЭДЭЭ | НИЙГЭМ
Улаанбаатар, 2024 оны арванхоёрдугаар сарын 31 /МОНЦАМЭ/. Замын хөдөлгөөн удирдлагын төвөөс автомашины замын хөдөлгөөний нөхцөл байдлын талаар мэдээлэл хийв.
Энэ үеэр тээврийн хэрэгслийн хөдөлгөөний хамгийн их ачаалал авч буй зарим уулзварт ирэх сарын 6-наас өөрчлөлт оруулахаар болсныг мэдэгдлээ. Монгол Улсад 1.2 сая орчим тээврийн хэрэгсэл бүртгэлтэйгээс 804 мянга нь Улаанбаатар хотынх. Өдөрт 480-500 мянган тээврийн хэрэгсэл хотын замын хөдөлгөөнд оролцож байна. Өглөөний 07:00-09:00 цаг, оройн 19:00-21:00 цагийн хооронд Их тойруу доторх төрийн албан байгуулагаас үйлчилгээ авахтай холбоотойгоор тээврийн хэрэгслийн тоо энэ хэмжээнд хүрч байгааг дурдлаа.
Тиймээс ирэх сарын 6-наас тухайн уулзварын хөдөлгөөний ачааллыг тэнцвэржүүлэх зорилгоор хөдөлгөөнийг өөрчлөх аж. Тухайлбал, өмнө нь Нарны хорооллоос баруун чиглэлд Нарны гүүрэн доогуур зорчиж байсан хөдөлгөөнийг баруунаас зүүн чиглэлд нэг чигийн болгон өөрчилж, Нарны хорооллоос гарахдаа зүүн гар тийш буюу урагш эргэж Нарын гүүр рүү нийлж хотын төврүү орох, хотын төвөөс нарны гүүрийг давж баруун эргэж гүүрэн доогуур зорчин Нарны хороолол орохоор, Алтай хотхоны оршин суугчдын тээврийн хэрэгслүүд төв зам руу нийлэхгүйгээр хойд чиглэлд “Туушин”-гийн урдуур явж, мөн Нарны гүүрэн доогуур гарч гүүрний зүүн талаас Нарын гүүртэй нийлж хотын төв рүү зорчих (Гурвалжингийн гүүр болон “Вагнер ази” компанийн урдах замаар зорчих тээврийн хэрэгсэл мөн) -оор төлөвлөжээ.
Үүнтэй холбогдуулан
“Алтай” хотхон болон Нарны
хороолол доторх хөдөлгөөнд ямар нэгэн өөрчлөлт орохгүй бөгөөд
хөдөлгөөний ачааллыг тэнцвэржүүлэх зорилгоор дунд голын замын зүүнээс баруун талын гүүр хүртэлх замыг
нэг чигийн хөдөлгөөнөөр, мөн
зүүн талын гүүрийг урдаасаа хойд чиглэлд, баруун талын гүүрийг хойноосоо урд
чиглэлд нэг чигийн хөдөлгөөнд оруулах
юм.
