Улаанбаатар
ДАРХАН-УУЛ: Жолооч торгуулиа хуулийн хугацаанд төлөөгүй тохиолдолд эрх хасах хүртэл арга хэмжээ авна
ОРОН НУТГИЙН МЭДЭЭ | ДАРХАН-УУЛ
Дархан, 2025 оны нэгдүгээр сарын 7 /МОНЦАМЭ/. Дархан-Уул аймаг дахь Цагдаагийн газрын Замын цагдаагийн тасгаас жолооч замын хөдөлгөөний дүрэм зорчиж торгуулсан торгуулиа хугацаанд нь төлөөгүй тохиолдолд авто машин жолоодох эрх хасах, нийтэд тустай хөдөлмөр хийлгэхээр хуулийн зохицуулалт хэрэгжиж эхэлсэн талаар мэдээлэв.
Тухайлбал, зөрчлийн тухай хууль болон зөрчил шалган шийдвэрлэх тухай хуульд нэмэлт өөрчлөлт орж, өнгөрсөн оны нэгдүгээр сарын 1-нээс эхлэн хэрэгжиж эхэлсэн. Тус хуульд заасан торгууль, татварын талаар мэдээлж, хуулийн хугацаанд торгуулиа төлж барагдуулах үүрэгтэйг анхааруулав.
Жолооч хуульд заасан 15 хоногийн хугацаанд торгуулиа төлөөгүй тохиолдолд торгуулийн төлбөр 50 хүртэл хувиар нэмэгдэнэ. Харин торгуулиа 15 хоногтоо багтаан төлбөл 50 хувь хөнгөлөхөөр тусгасан байна.
Жишээ нь жолооч та 50000 төгрөгөөр торгуулж, заасан хугацаанд төлөөгүй тохиолдолд 75000 төгрөг болж нэмэгдэнэ гэв.
Тиймээс
хуулийн хугацаанд үүргээ ухамсарлаж торгуулиа төлөөгүй бол жолоодох эрхийн үнэмлэх авах, сунгах,
ангилал нэмэх, өөрчлөх, нөхөн авах, тээврийн хэрэгслийн эзэмшлийн шилжилт хөдөлгөөн
хийх эрхийг хязгаарлахаас гадна жолоодох эрхийг хасах, нийтэд тустай ажил хийлгэх арга
хэмжээ авахыг аймгийн Замын цагдаагийн тасгаас анхаарууллаа.
