Улаанбаатар
Олон давхаргат тэтгэврийн тогтолцоог нэвтрүүлэхээр зорьж байна
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 2 /МОНЦАМЭ/. Гэр бүл, хөдөлмөр, нийгмийн хамгааллын яам Дэлхийн банктай хамтран ажиллаж байна.
Монгол Улсын Их Хурлаас баталсан Төрөөс тэтгэврийн шинэчлэлийн талаар баримтлах бодлого, Монгол Улсын урт болон дунд хугацааны бодлогын баримт бичигт тэтгэврийн шинэчлэлийн талаар олон давхаргат тэтгэврийн тогтолцоог нэвтрүүлэх, хуваарилалтын тогтолцооноос хагас хуримтлалын тогтолцоонд үе шаттай шилжих зэрэг зорилт тусгасан.
ГБХНХЯ-ны Төрийн нарийн бичгийн дарга Л.Мөнхзул Дэлхийн банкны ахлах эдийн засагч Алексей Случинськ уулзаж, Монгол Улсын тэтгэврийн шинэчлэлийн бодлогын хувилбаруудад хийсэн дүн шинжилгээтэй танилцсан юм. Гэр бүл, хөдөлмөр, нийгмийн хамгааллын яам, Нийгмийн даатгалын ерөнхий газрын холбогдох мэргэжилтнүүд Дэлхийн банкны ахлах эдийн засагчтай хамтран тэтгэврийн шинэчлэлийн бодлогын хувилбаруудын актуар тооцоололын үр дүнг хэлэлцэж, холбогдох судалгаа, тооцооллыг хамтран хийж байна.
Тодруулбал, судалгаа, тооцооллоос харахад Монгол Улсын хүн ам зүйн
бүтцэд өөрчлөлт орж, хүн амын дундаж насжилт, нийт хүн амд эзлэх ахмад настны
эзлэх хувь нэмэгдэж байна. Ингэснээр 10 даатгуулагчид ногдох тэтгэвэр авагчийн
тооны харьцаа 2024 онд тав хүн байсан бол 2030 онд долоон хүн болох урьдчилсан
тооцоололтой байна. Тиймээс Монгол Улс тэтгэврийн шинэчлэлийг үргэлжлүүлж,
хуваарилалтын тогтолцооноос хагас хуримтлалын тогтолцоонд үе шаттай шилжих,
олон давхаргат тэтгэврийн тогтолцоог нэвтрүүлэхээр зорьж байгаа аж.
