Ulaanbaatar
А.Амбасэлмаа: Сүрьеэгийн эмчийн давтан шинжилгээний хариу сөрөг гарсан
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. УОК-ын Шуурхай штабын дарга, хурандаа Б.Ууганбаяр, ЭМЯ-ны Олон нийттэй харилцах шуурхай удирдлагын хэлтсийн дарга Д.Нарангэрэл, ХӨСҮТ-ийн Тандалт судалгааны албаны дарга А.Амбасэлмаа нар ЭМЯ-ны ээлжит мэдээллийн дараа сэтгүүлчдийн асуултад хариулав.
-Өчигдөр ХӨСҮТ-ийн Сүрьеэгийн тасагт коронавирусний тохиолдол батлагдаж, улмаар тэнд байсан хүмүүсийг тусгаарласан тухай мэдээлэл байна. Энэ талаар мэдээлэл өгнө үү?
А.Амбасэлмаа: Нийтийн сүлжээгээр ийм мэдээлэл гарсан. Бид өдөр бүрийн 11.00 цагт батлагдсан тохиолдлуудын мэдээллийг албан ёсоор өгдөг. Тэгэхээр дээрх мэдээлэл бол албан бус мэдээлэл байна. Сүрьеэгийн эмчийн эхний сорьц эргэлзээтэй гарсан. Бид шинжилгээг лабораторийн шинжилгээ болон асуумжаар оношилдог. Энэхүү асуумж нь сэжигтэй тохиолдол нь коронавирусний батлагдсан тохиолдолтой ойр байсан эсэх, хамгаалалтын хувцас, маскгүй уулзсан эсэх зэргийг тодруулдаг. Өдөрт 10-20 мянган шинжилгээ хийхэд ганц нэг хуурамч, эргэлзээтэй зүйл гардаг. Бид бүх сэжигтэй тохиолдлыг баталгаажуулж байж нийтэд зарладаг. Сүрьеэгийн эмчийн давтан шинжилгээ өнөөдөр сөрөг гарсан.
