Ulaanbaatar
ДУНДГОВЬ: Аймгийн нийт нутгаар 2-5 см зузаан цасан бүрхүүл тогтжээ
ОРОН НУТГИЙН МЭДЭЭ | ДУНДГОВЬ
Мандалговь, 2023 оны арванхоёрдугаар сарын 14 /МОНЦАМЭ/. 2023 оны 12 дугаар сарын 10-ны өдрөөс эхлэн Дундговь
аймгийн нутгаар цас орж, нийт нутгаар 2-5 см зузаан цасан бүрхүүл тогтсон
байна.
УЦУОШТ-ийн мэдээлснээр 12 дугаар сарын 10-нд Дэлгэрхангай,
Хулд, Луус, Сайнцагаан, Гурвансайхан, Өлзийт сумын нутгаар цас орж, салхи
зүүнээс секундэд 5-10 м/с хүрч зөөлөн цасан шуурга шуурсан, 13-ны өдрийн 17
цагийн байдлаар цас үргэлжлэн орж, цасны түвшин нэмэгдэж, хүйтний эрч чангарсан,
12 дугаар сарын 14-ний 8 цагийн байдлаар Сайхан-Овоо, Говь-Угтаал, Адаацаг,
Луус, Хулд, Дэлгэрхангай сумын нутгаар 1,9-3,0 мм, бусад сумдын нутагт 0,2-1,5
мм цас орсон байна.
Цаг уурын ажиглалтын талбай дах хэмжилтээр Дэрэн,
Дэлгэрхангай, Сайхан-Овоо сумын нутгаар 5 см, бусад сумдад 2-4 см зузаан цасан
бүрхүүл тогтжээ. Аймгийн төвд авто зам мөстөж, хальтиргаа үүссэн байна.
Одоогийн байдлаар баруун сумдын нутагт цас тогтож, харин зүүн сумдад үргэлжлэн орж байгаа бөгөөд өдөртөө -19-24, шөнөдөө -23-28, зарим шөнө -30 хэм хүртэл хүйтэрч байгааг УЦУОШТ-өөс тодотголоо. 12 дугаар сарын 18-нд аймгийн нийт нутгаар дахин цас орох бөгөөд хүйтний эрч сулрахгүй гэдгийг тус байгууллагаас мөн мэдээллээ.
