Ulaanbaatar
Гретцки, Овечкин нарын гоолын зөрүү 5 боллоо
ДЭЛХИЙН МЭДЭЭ | СПОРТ
ОТТАВА, 2025 оны гуравдугаар
сарын 26. /ТАСС/. Хойд Америкийн Үндэсний хоккейн лигийн /NHL/ “Вашингтон Кэпиталз” багийн ахлагч,
Оросын довтлогч Александр Овечкин “Виннипег Жетс” багтай хийсэн тоглолтод шайб
орууллаа.
Ингэснээр өдгөө 39 настай тэрбээр 889 дахь гоолоо
оруулж, NHL-ийн түүхэнд хамгийн олон гоол оруулсан Канадын домогт хоккейчин Уэйн Гретцкигийн амжилтыг
давтахын тулд 5 шайб хийх үлдлээ. У.Гретцки 1487 тоглолтод
оролцохдоо нийт 894 гоол оруулсан юм.
Энэ удаад “Вашингтон” баг нэмэлт
цагт 2:3 харьцаагаар хожигдсон байна. Овечкин III үе дуусахаас 4 минутын өмнө,
түүний багийн Эндрю Манжапане 20 дахь минутанд тус тус гоол оруулсан байна.
Харин “Виннипег”-ийн Жош Моррисси (7), Мэйсон Эпплтон (40) Николай Элерс (62)
нар гоолджээ.
“Вашингтон”, “Виннипег” багууд
энэ улиралд тун амжилттай тоглож байгаа юм. Вашингтончууд 71 тоглолтод 103 оноо
авснаар плей-оффт оролцох эрхээ хэдийн авч, Дорнод конференц ба Нийслэлийн
дивизионд тэргүүлж байгаа бол “Виннипег Жетс” баг 72 тоглолтод 102 оноо авснаар
Стэнлийн цомд тоглох эрхээ авчээ.
Дараагийн удаад вашингтончууд 28-нд
шилжих шөнө “Миннесота Уайлд” багтай талбайд нь тоглох бол “Виннипег” баг 29-нд
шилжих шөнө өөрийн талбайд “Нью-Жерси Дэвилз” багийг хүлээн авна.
NHL-ийн энэ улирлын тэмцээн
дуусах хүртэл “Вашингтон Кэпиталз” баг 11 тоглолт хийнэ.
