Улаанбаатар
“Хорийн бүлэг”-ийн Гадаад хэргийн сайд нарын уулзалт эхэлжээ
ДЭЛХИЙН МЭДЭЭ | УЛС ТӨР
БРАЗИЛИЯ, 2024 оны хоёрдугаар сарын 22 /Anadolu/. “Хорийн бүлэг”-ийн /G20/ орнуудын Гадаад хэргийн сайд нарын уулзалт Бразил улсын Рио-де-Жанейро хотноо эхэллээ.
Энэ удаагийн уулзалтаар дэлхий дахинд үүссэн хурцадмал нөхцөл байдал, Орос-Украины дайн, Израил, ХАМАС-ын мөргөлдөөн зэрэг асуудлыг хэлэлцэх юм. Мөн олон талт байгууллагуудыг бэхжүүлэх, уур амьсгалын өөрчлөлт болон ядууралтай тэмцэх, дэлхийн засаглалын механизмыг шинэчлэх зэрэг асуудлуудыг хөндөнө.
"G20"-ийн хэлэлцээнд Бразилын төлөөлөн оролцогч Маурисио Лирио уулзалтын өмнө сэтгүүлчдэд хэлэхдээ "Бид засаглалгүй дэлхийд амьдарч, урьд өмнө хэзээ ч байгаагүй мөргөлдөөний үеийг туулж байна. Дэлхий дахинд тулгамдаж буй асуудлыг шийдвэрлэх засаглал хангалтгүй байна” гэв.
Тэрбээр НҮБ-ын Аюулгүйн зөвлөлийг өргөжүүлэх, шинэчлэхийг дэмжиж байгааг илэрхийлээд хориг тавьсан орнуудын эсэргүүцлийн улмаас зөвшилцөлд хүрч чадахгүй байгааг онцлон тэмдэглэсэн байна.
Үүний сацуу АНУ-ын Төрийн нарийн бичгийн дарга Энтони Блинкен, Оросын Гадаад хэргийн сайд Сергей Лавров нар 2023 оны гуравдугаар сарын 2-нд Шинэ Дели хотод уулзсанаасаа хойш дахин нүүр тулан уулзах төлөвтэй байна.
Дэлхийн хамгийн том эдийн засагтай 20 орныг нэгтгэдэг G20-ийн удирдагчдын дээд хэмжээний уулзалт ирэх 11 дүгээр сард Рио-де-Жанейро хотноо болно.
