Улаанбаатар
“Эрүүл мэндийн сэтгүүл зүй ба мэдээлэл, харилцаа холбоо” сэдэвт сургалт болов
МОНГОЛЫН МЭДЭЭ | ЭРҮҮЛ МЭНД
Улаанбаатар, 2024 оны хоёдугаар сарын 24 /МОНЦАМЭ/. Эрүүл мэндийн яам, Эрүүл мэндийг дэмжих сангийн санхүүжилтээр Ерөнхийлөгчийн Тамгын газрын “Эрүүл Монгол хүн” төсөл, хөтөлбөр хариуцсан алба, Монголын эрүүл мэндийн сэтгүүлчдийн “Цагаан үзэг” холбоо хамтран эрүүл мэндийн байгууллагын хэвлэл мэдээллийн ажилтан болон сэтгүүлчдэд зориулсан “Эрүүл мэндийн сэтгүүл зүй ба мэдээлэл, харилцаа холбоо” сэдэвт чадавхжуулах сургалтыг өчигдөр зохион байгууллаа.
Ерөнхийлөгчийн Эрүүл мэнд, спорт нийгмийн бодлогын зөвлөх, анагаах ухааны доктор Т.Мөнхсайхан сургалтыг нээж хэлэхдээ "Манай улсын хүн амын 3,9 хувь нь эрүүл, зөв зан үйл, идэвхтэй амьдралын хэв маягтай. Харин үлдсэн нь амьдралын буруу дадал, хэвшил, урьдчилан сэргийлэлт хангалтгүйгээс өнөөдрийн олон өвчин, эндэгдэл үүсэхэд голлон нөлөөлж буй гэсэн судалгаа бий. Тэгвэл эрүүл мэндийн сэтгүүл зүй нь олон нийтийн эрүүл мэндийн талаарх мэдлэг ойлголтыг сайжруулах, буруу ташаа мэдээллийг засах, эрүүл зан үйлийг дэмжих, сурталчлах зэрэг нийгэмд үзүүлэх үр нөлөө их. Энэ ч үүднээс бид олон улсын сайн туршлагыг судалж, нутагшуулахаар эрүүл мэндийн сэтгүүл зүйг хөгжүүлэх чиглэлд их дээд сургуулийн хэмжээнд хөтөлбөр нэмэлтээр оруулах ажлыг эхлүүлээд байна" гэлээ.
ЭМЯ, НЭМГ-ын Урьдчилан сэргийлэлт, хяналт зохицуулалтын хэлтсийн дарга Б.Туяа "Монгол Улсын урт болон богино хугацааны бүхий л баримт бичигт иргэдэд эрүүл мэндийн боловсролыг олгох, эрүүл амьдралын дадал зуршлыг бий болгох, идэвхтэй амьдралын хэв маягтай иргэнийг төлөвшүүлэх, энэ чиглэлд ухуулга нөлөөллийн ажлыг хийж хэрэгжүүлэх томоохон зорилтуудыг дэвшүүлэн ажиллаж байна. Нийтийн эрүүл мэндийн мэдлэг боловсролыг дээшлүүлэхэд хэвлэл мэдээллийн ажилтнууд, сэтгүүлчдийн үүрэг, оролцоо нэн чухал. Тиймээс өнөөдрийн сургалтаар эрүүл мэндийн мэдээ мэдээллийг бэлтгэх, түгээх, арга аргачлалаас суралцах, мэдээ мэдээллийг үр дүнтэй олон нийтэд хүртээмжтэй хүргэхэд шаардлагатай ур чадварыг олж авна гэдэгт итгэлтэй байна" гэв.
Бүтэн өдөр үргэлжилсэн сургалтад нийт 60 орчим төлөөлөл оролцов. Ташрамд дурдахад "Эрүүл Монгол хүн" үндэсний хөдөлгөөний хүрээнд нийтийн эрүүл мэндийн боловсролыг нэмэгдүүлэх чиглэлд сэтгүүл зүйн боловсон хүчин бэлтгэдэг их дээд сургуулиудад “Эрүүл мэндийн сэтгүүл зүйн хөтөлбөр”-ийг нэмэлтээр оруулахаар болж, зургаан сургууль хамтарсан ажлын хэсэг байгуулсан аж.
