Ачаалж байна…
Ачаалж байна…
Altantsetseg .G

Баян-Өндөр, 2026 оны арваннэгдүгээр сарын 17 /МОНЦАМЭ/. БНСУ-ын “Вит-Ин Интернэйшнл” компани хог хаягдлыг боловсруулж эрчим хүч үйлдвэрлэх технологийг Орхон аймагт нэвтрүүлэх, нарны эрчим хүчний системд тулгуурласан төсөл хэрэгжүүлэх боломжийн талаар санал танилцууллаа.
Тус компани хог хаягдлыг эрчим хүч болгон хувиргах, нарны эрчим хүч ашиглах технологид суурилсан байгаль орчин, дэд бүтцийн төслүүдийг олон улсад хэрэгжүүлдэг ажээ.
Үйлдвэрлэл, хүн амын төвлөрөл ихтэй Эрдэнэт хотын хувьд хог хаягдлын хэмжээг бууруулах, дахин боловсруулах, ашиглах боломжтой нөөцийг эдийн засгийн эргэлтэд оруулах нь байгаль орчны бохирдлыг багасгах, хотын хөгжлийн тулгамдсан асуудлыг шийдвэрлэх нэг чиглэл юм. Ялангуяа хог хаягдлыг зөвхөн цуглуулж, булшлах бус, боловсруулж хоёрдогч түүхий эд, эрчим хүч үйлдвэрлэхэд ашиглах нь нөөцийн үр ашгийг нэмэгдүүлэх ач холбогдолтой.
Уулзалтын үеэр талууд хог хаягдлыг боловсруулах, эрчим хүч үйлдвэрлэх технологийн боломж, байгаль орчинд үзүүлэх эерэг болон сөрөг нөлөөлөл, орон нутгийн нөхцөлд тохирсон шийдлийн талаар санал солилцов. Мөн төслийг хэрэгжүүлэхэд шаардлагатай дэд бүтэц, хөрөнгө оруулалт, технологийн сонголтын асуудлыг хөндсөн байна.
Цаашид тус компанийн санал болгож буй технологийн шийдэл, хөрөнгө оруулалтын нөхцөл, техник, эдийн засгийн үндэслэл, байгаль орчинд үзүүлэх нөлөөллийг нарийвчлан судалж, аймгийн хөгжлийн бодлого, ногоон хөгжлийн зорилтод нийцүүлэн хамтран ажиллах боломжийг тодорхойлохоор болов